MAE hamutuk ho Vise Primeiru-Ministru no Ministru Planu no Ordenamentu José Maria dos Reis halo vizita ofisiál no distribui nesesidade bázika ba vítima dezastre naturál iha sentru evakuasaun Grupu II João Paulo II Tasi-Tolu, Dili. Imajen/Mídia MAE.

DILI, 13 abril 2021 (TATOLI)—Governu liuhosi Ministériu Administrasaun Estatál (MAE) halo ona vizita ofisiál ba komunidade afetadu inundasaun hodi hato’o Sentidu Solidariedade no haree diretamente kondisaun vitima dezastre naturál ne’ebé hela iha sentru evakuasaun sira iha Dili laran.

Vise-Ministru Administrasaun Estatál, Lino de Jesus Torrezão, informa iha semana kotuk ekipa Ministériu Administrasaun Estatál (MAE) distribui ona apoiu umanitáriu ba família afetadu hamutuk 4.400.

“Ita fó apoiu umanitáriu ne’e iha semana kotuk ba família afetadu hamutuk 4.400,” Lino de Jesus Torrezão hatete ba Ajénsia TATOLI, liuhosi telefónika, tersa ne’e.

Lino Torrezão hateten, apoiu umanitáriu ne’e distribui de’it ba vítima sira iha aldeia no suku sira-ne’ebé afetadu ba dezastre naturál ne’ebé akontese iha Kapitál Dili, domingu (04/04) semana kotuk.

“Ita fó apoiu nesesidade bázika ba ita-nia komunidade afetadu sira-ne’ebé lakon uma, lakon vida, balun nia uma bee no tahu tama, ne’ebé kauza hosi udan no anin ne’ebé akontese iha loron 04 abril, foin lalais ne’e,” Lino Torrezão hateten.

Membru Guvernu ne’e haktuir, ekipa MAE vizita ona ba populasaun no fó apoiu umanitáriu ba vítima sira-ne’ebé evakua no refujia iha Eskola Sabaraka Laran Becora, Bedois-Camea no Hera, hodi distribui nesesidade bázika hanesan foos, lona no seluk tan.

“Ami halo apoiu solidariedade ba ema-ne’ebé mak ninia sasán mota lori, uma lakon totál, balun bee tama uma inklui lakon sasán uma-laran. Apoiu ne’e bazea ba dadus akuradu tanba dadus ne’e maihosi Prezidente Autoriedade Munisípiu Dili ho autoridade komunitária sira iha suku sira-ne’ebé afetadu,” nia hateten.

Vise-Ministru ne’e hateten, sira fó apoiu umanitáriu ne’e bazea ba lista hosi autoridade sira, atu nune’e vítima afetadu sira labele hetan no simu dobru.

Governante ne’e hateten, iha kinta (08/04/2021), ekipa MAE hamutuk ho Vise Primeiru-Ministru no Ministru Planu no Ordenamentu José Maria dos Reis halo vizita ofisiál ba komunidade afetadu inundasaun sira iha São Paulo, no fatin rua iha Tasi-Tolu, iha Aldeia 05 Suku Fatuhada, hodi haree direta kondisaun vitima sira-nian iha terrenu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here