MAE hamutuk ho Vise Primeiru-Ministru no Ministru Planu no Ordenamentu José Maria dos Reis halo vizita ofisiál no distribui nesesidade bázika ba vítima dezastre naturál iha sentru evakuasaun Grupu II João Paulo II Tasi-Tolu, Dili. Imajen/Mídia MAE.

DILI, 04 maiu 2021 (TATOLI)-Tuir dadus hosi Ministériu Administrasaun Estatál (MAE), to’o ohin rejista família afetadu dezastre naturál aumenta  ba   33.177 iha territóriu Timor-Leste (TL).

“Ohin, kompleta fulan ida dezastre ne’ebé akontese no Governu rejista família 33.177 mak sai afetadu. Hosi númeru ne’e, família  besik 90% mak hosi Dili no 10%  hosi Munisípiu. Intervensaun ne’ebé Governu hala’o mak fó ona apoiu emerjénsia, hanesan ai-han no la’ós ai-han ba família 50% hosi totál família 33.177,” Ministru Administrasaun Estatál, Miguel Pereira de Carvalho, hateten ba jornalista, hafoin sorumutu ho Primeiru-Ministru (PM), Taur Matan Ruak, iha rezidénsia Faról, Dili, tersa ne’e.

Ekipa ne’ebé lidera hosi MAE hamutuk ho protesaun sivíl no parseiru  halo ona levantamentu dadus ba uma ne’ebé hetan estragu, nune’e bele fó apoiu rekoperasaun hodi konstrui fila-fali.

“Governu sei solusiona família-sira ne’ebé uma hetan estragu, hanesan dadus ne’ebé iha família 25.000 mak afetadu, iha uma 24.000 aat kaman, aat natoon 553 no aat totál 554,” Miguel Pereira de Carvalho, haktuir.

Governante ne’e  hatutan, iha orsamentu retifikativu prevee ona  millaun $55 ne’ebé hetan ona aprovasaun hosi Prezidente Repúblika (PR), sei fó forsa liután ba Sekretaria Estadu Protesaun Sivíl (SEPS), atu bele kontinua fó  asisténsia umanitária no mós ba rekoperasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here