Bee kontinua hoban uma komunidade iha Aldeia Moris Foun, Tasi-tolu impaktu hosi inundasaun iha 04 abríl. Imajen Tatoli/Eugénio Pereira.

DILI, 04 maiu 2021 (TATOLI)-Tuir dadus hosi Ministériu Administrasaun Estatál (MAE) identifika família hamutuk 2.558 mak hela iha área risku dezastre naturál iha Munisípiu Dili.

“Família 2.558 ne’ebé hela iha área risku ba dezastre naturál hanesan besik mota, foho-lolon no lagoa ninin ne’ebé presiza fó solusaun hodi prevene iha tempu tuir-mai,’’ Ministru Administrasaun Estatál (MAE), Miguel Pereira de Carvalho, hateten ba jornalista hafoin sorumutu ho Primeiru-Ministru (PM),Taur Matan Ruak, iha rezidénsia Faról, Dili, tersa ne’e.

Notísia Relevante : Família afetadu 33.177 iha territóriu no 50% simu ona apoiu emerjénsia

Iha sorumutu ne’e, Miguel Pereira de Carvalho ne’ebé akompaña hosi Sekretáriu Estadu Protesaun Sivíl (SEPS), Joaquim Gusmão, ko’alia  ho Xefe Governu atu bele fó solusaun ruma ba kestaun ne’e.

Nia dehan, medida saida mak Governu sei foti liu-liu bainhira  atu re-aloka família-sira ne’e ba iha fatin seguru, sei pronunsia iha tempu tuir-mai.

Ministériu Justisa (MJ) liuhosi Diresaun Nasionál Teras no Propriedade (DNTP) identifika ona  rai Estadu ne’ebé mamuk iha fatin tolu atu bele re-aloka vítima dezastre naturál ne’ebé hela iha área risku fatin risku.

Fatin tolu ne’e nu’udar rai Estadu ho luan ka ektare 20-resin iha  Hera, Beduku ektare neen (6) no Tibar ektare neen (6).

MJ prepara fatin ne’e hodi hein aprezenta ba  entidade relevante no kontribui ba planu hosi Ministériu Planu no Ordenamentu (MPO) ho Ministériu Obras Públika (MOP) kona-ba urbanizasaun no atu re-aloka família sira.

Iha loron 17 abríl 2021, Primeiru-Ministru (PM), Taur Matan Ruak, orienta ona Ministru Justisa (MJ), Manuel Cárceres da Costa, atu halo identifikasaun ba  rai Estadu ne’ebé mamuk  atu bele re-aloka vítima dezastre naturál ne’ebé hela iha area risku hanesan mota-ninin, foho-lolon ho Lagoa Tasi-Tolu ba iha fatin foun ne’ebé livre hosi ameasa inundasaun iha tempu tuir-mai.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here