Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 12 maiu 2021 (TATOLI)—Ministru Administrasaun Estatál (MAE), Miguel Perreira de Carvalho, ohin, relata ba Prezidente Repúblika Francisco Guterres Lú Olo kona-ba atividade preparativa ba realizasaun eleisaun prezidensiál iha 2022.

Notísia Relevante: Konstituisaun RDTL obriga kada tinan-lima tenke hili Prezidente Repúblika foun

“Ha’u mai informa ba Prezidente Repúblika saida mak Governu halo ona no planea atu halo mak prepara ba eleisaun prezidensiál ba tinan 2022 nian. Tanba, hanesan ita hotu hatene mandatu Prezidente Repúblika sei termina iha tinan oin,” Miguel Perreira de Carvalho hateten ba jornalista sira, hafoin enkontru ho Prezidente Repúblika, iha rezidénsia Faról, Dili, kuarta ne’e.

Governante ne’e hatutan, órgaun ne’ebé ezekuta aktu eleitorál mak Sekretariadu Tékniku Administrasaun Eleitorál (STAE) ne’ebé hala’o ona ninia atividade sira no preparadu atu realiza eleisaun prezidensiál iha 2022, mezmu Timor-Leste iha situasaun pandemia COVID-19.

Ba atividade preparasaun sira-ne’e, to’o loron 31 marsu tinan ne’e, STAE rejista ona eleitór sira hamutuk 839.430 ba eleitór sira-ne’ebé maiória iha rai-laran no mós rai-li’ur kuaze eleitór hamutuk 6.010.

Tuir nia, STAE mós hahú hosi 01 jullu tinan ne’e to’o janeiru tinan oin (2022), STAE sei halo resensiamentu eleitorál no atualizasaun baze dadus eleitorál nian para tempu balun antes eleisaun tenke públika ona lista eleitór sira iha sentru votasaun sira.

“Asuntu ida-ne’e mak ohin ha’u informa ba Prezidente Repúblika. STAE agora dadauk iha faze de pre-eleitorál, sira halo ona atividade lubuk ida ona ita tempu ida liuba ne’e, depois faze periódu eleitorál sei hala’o iha janeiru 2022 to’o realizasaun eleisaun prezidensiál tanba STAE preparadu atu halo eleisaun,” nia dehan.

Medida sira ne’ebé mak STAE halo ona no mós sei halo hodi prepara eleitór sira ba tuir votasaun iha hotu ona, no Governu liuhosi STAE preparadu atu realiza eleisaun prezidensiál iha tinan oin.

STAE hanesan órgaun ne’ebé mak ezekuta aktu eleitorál referendáriu sira-ne’ebé tutela ba Governu liuliu iha Ministériu Administrasaun Estatál preparadu atu realiza eleisaun prezidensiál iha 2022.

Kona-ba asuntu ida-ne’e, nia dehan, Prezidente Repúblika kontente rona oinsá preparativu hosi Governu ninian hodi realiza Eleisaun Prezidensiál iha 2022, liuliu informa ba Xefe Estadu kona-ba planu ida-ne’ebé Governu halo liuhosi halo alterasaun lei eleitorál atu votante bele vota iha Dili, karik votante ne’e hela iha Dili.

“Ha’u mós informa kona-ba planu ne’ebé Governu halo ona liuhosi halo alterasaun ba dala neen lei eleitorál prezidensiál nian, para permite ita-nia populasaun liu-liu sira ne’ebé hele iha Dili atu bele vota de’it iha Dili. Sira-ne’ebé atu fila mai Dili maibé tenke avizu antes ba STAE pelumenus loron 40, para STAE públiku lista eleisaun iha sentru votasaun sira iha territóriu nasionál inklui sentru votasaun paralelu sira,” nia hateten.

Notísia Relevante: Trimestre daruak, MAE halo preparasaun ba Eleisaun Prezidensiál

COVID-19, preprasaun ba eleisaun prezidensiál labele la’o

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here