Prezidente CNE, Alcino de Araújo Barris . Imajen TATOLI/Egas Cristovão.

DILI, 10 maiu 2021 (TATOLI)—Prezidente Komisaun Nasionál Eleisaun (CNE-sigla portugés), Alcino de Araújo Barris, hatetenp reparasaun ba eleisaun prezidensiál hanesan edukasaun sivika, edukasaun votante no rekolla kartaun eleitorál ba ema ne’ebé mate ona sei pendente tanba governu implementa serka sanitária no konfinamentu domisiliáriu.

Notísia Relevante: Trimestre daruak, MAE halo preparasaun ba Eleisaun Prezidensiá

Nia hatutan, atividade halo deslokasaun ba munisípiu mós labele hala’o maibé atu fasilita servisu, CNE halo beibeik enkontru ho funsionáriu sira no ho Sekretariadu Tékniku Administrasaun Eleitorál (STAE) liuhosi virtuál.

“Espesifikamente atu organiza eleisaun ne’e seidauk tanba prazu sei dook hela maibé pandemia COVID-19 ne’e halo CNE nia atividade preparasaun ba prioridade eleisaun prezidensiál nian mós labele halo,” Alcino de Araújo Barris hateten ba jornalista sira hafoin tuir teste swab masal iha salaun CNE, Colmera, Dili, segunda ne’e.

Nia preokupa tanba atividade hirak ne’e CNE baibain halo iha 15 jullu 2020, maibé iha novembru tama fali konfinamentu entaun paradu. Problema seluk mak orsamentu tanba CNE nia osan sei iha prosesu apresiasaun no aprovasaun, nune’e paradu to’o ohin loron.

Maske nune’e, nia informa, formasaun ba funsionáriu sira kontinua la’o nafatin no oras ne’e balun tuir hela formasaun Ásia Demokrátiku ne’ebé fasilita hosi ADL no Bangkok.

Seluk mak, nia dehan atividade divulga informasaun la’o nafatin no enkontru iha nível internasionál liuhosi virtuál ho Comunidade Paises da Lingua Portuguesa (CPLP).

Oras ne’e CNE konklui ona relatóriu tinan ida-nian hodi aprezenta ba Parlamentu Nasionál (PN).

Notísia relevante:2021, tinan preparativu ba eleisaun

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here