Ministru Administrasaun Estatal (MAE), Miguel Pereira de Carvalho . Imajen/Media MAE.

DILI, 23 abríl 2021 (TATOLI)—Ministru Administrasaun Estatal (MAE), Miguel Pereira de Carlvalho, fó-sai katak iha trimestre daruak (abríl, maiu no juñu) ne’e MAE sei hahú halo preparasaun ba Eleisaun Prezidensiál.

Notisia Relevante: Trimestre dahuluk, MAE konstrui “Uma Kbiit Laek” ba ema kbiit laek

“Iha trimestre daruak ami hahú halo preparasaun ba eleisaun jerál prezidensiál 2022. Agora daudaun ne’e ami hahú ona rekrutamentu ba ofisiál resensiamentu eleitorál sira, tanba tuir lei ne’e ita tenke halo fulan 6 antes eleisaun prezidensiál,” Miguel Pereira de Carvalho, ko’alia iha resintu Parlamentu Nasionál, sesta ne’e.

Nia esplika, resensiamentu eleitorál hosi Sekretariadu Tékniku Administrasaun Eleitorál (STAE) sei hahú iha 1 jullu to’o 31 dezembru.

“Iha ona prosesu preparativu sira ba ida-ne’e, tanba ne’e sei sai hanesan prioridade iha trimestre daruak nian,” nia dehan.

Iha trimestre daruak ne’e mós sei solusiona problema cheias (dezastre naturál) no inundasaun ne’ebé akontese iha loron 4 abríl liubá.

“Ami rejista ona komunidade afetadu sira hamutuk rihun 28 iha territóriu nasionál, Dili mesak de’it kuaze rihun 25, barak liu hosi Dom Aleixo ho rihun 10, Cristo Rei rihun sia (9) no menus hosi Nain Feto. Ne’e mós sai prioridade seluk hosi MAE nian ba trimestre daruak,” nia hateten.

Iha trimestre daruak ne’e mós, MAE garante katak atu munisípiu sira bele konklui prosesu aprovizionamentu ba projetu 52 ba PDIM (Programa Dezenvolvimentu Integradu Munisipál).

“Ita hakarak trimestre daruak ne’e kontratu hotu-hotu ba projetu 52 ne’e tenke asina. Atu asina kontratu sira-ne’e presiza Ajénsia Dezenvolvimentu Nasionál verifika lalais dezeñu no BoQ sira-ne’ebé munisípiu sira hatama ona,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here