Primeiru-Ministru, Taur Matan Ruak, hamutuk ho entidade relevante observa direta estrada protokolu Praia dos Coqueiros ne’ebé hetan estragus hosi dezastre naturál, tersa (06/04/21). Imajen Tatoli/Egas Cristóvão.

DILI, 19 abríl 2021 (TATOLI)—Tama ona semana rua estrada protokolu iha Praia dos Coqueiros, iha Embaixada Japaun nia oin kotu tanba inundasaun iha domingu (04/04), ekipa task force hosi Diresaun Nasionál Obra Públika, Ministériu Obra Públika (MOP) no Ajénsia Dezenvolvimentu Nasionál (ADN) finaliza no aprova ona dezeñu no Bill of Quantity (BoQ) hodi halo rekuperasaun.

Diretór Jerál Obra Públika no Koordenadór Grupu Tékniku ba Ekipa Task Force, Rui Hernani, hateten, ekipa aprezenta ona empreza tolu ba Konsellu Administrasaun Fundu Infraestrutura (KAFI) no parte Komisaun Nasionál Aprovizionamentu (CNA, sigla Portugés) mak sei halo selesaun empreza no halo kontratu tuir parte legál.

“Ohin ami aprezenta ona materiál BoQ ba KAFI no daudaun ne’e CNA halo ezersísiu aprovizionamentu no hein asina kontratu ho empreza ida atu halo rekuperasaun imediata. Ami hein de’it bainhira kontratu asina ona, fó biban ba ami atubele akompaña no superviziona aktividade sira ne’e,” Koodernadór Grupu Tékniku informa ba Agência TATOLI, hafoin ramata reuniaun KAFI, iha salaun Ministériu Finansa, Aitarak-laran, segunda ne’e.

Notísia relevante: Ekipa task force finaliza BoQ rekupera estrada Embaixada Japaun oin

Tuir Responsável ne’e, seidauk bele fó sai naran empreza tolu ne’e, maibé antes ne’e empreza hirak ne’e halo ona rekuperasaun estragu kauza inundasaun ne’ebé akontese iha 13 marsu 2020 no sira servisu iha área espesífiku nahe alkatraun.

Ekipa task force entrega ona prosesu aprovizionamentu atu CNA selesiona ida entre empreza tolu, atu sai vensedór no kaer obra ne’e.

“Maski ita hein kleur, maibé tenke pasénsia tanba prosesu burokrasia mak naruk oituan no lei mós la premite atu ami halo lalais, ne’ebé indika empreza atu halo rekuperasaun presiza la’o tuir prosidementu legál,” nia akresenta.

Notísia relevante: KAFI simu dadus estagu provizóriu dezastre naturál hamutuk millaun $45

Aleinde ne’e, iha reuniaun KAFI, ekipa task force atualiza kona-ba prosesu identifikasaun estragu infraestrutura hanesan mota iha RTK-dirasaun Maloa bá Tuana-laran, estrada Bidau iha Hospital Nasional Guido Valadares (HNGV) nia kotuk, estrada ligasaun Tibár bá Ermera, Ponte Loes, Ponte Bekusi no estrada CPLP ba tasi ibun Bebonuk.

 “Ami aprezenta atividade sira atu halo rekuperasaun imediata, maibé ita kontinua fó prioridade ba limpeza, normalizasaun no hasai sedimentasaun iha ponte no estrada sira,” nia subliña.

Kona-ba sobu Ponte Bekusi iha Taibesi, tuir Diretór ne’e, iha hela prosesu elaborasaun dezeñu no BoQ, ne’ebé seidauk bele sobu ponte atuál tanba presiza fasilita movimentu ema no transporte sira.

Notísia relevante: PM orienta MPO-MOP sobu ponte Bekusi no harii foun

“Ami kumpre orientasaun  Primeiru-Ministru, ne’ebé bainhira prosesu dezeñu no BoQ finaliza, hafoin Ajénsia Dezenvolvimentu Nasionál (ADN) verifika no halo prosesu aprovizionamentu maka bele sobu ponte tuan no harii foun,” nia hatutan.

Entretantu, estragu iha nível territóriu nasionál seidauk bele aprezenta ba KAFI, tanba ne’e hahú aban ekipa tékniku sira foin tun ba kada munisípiu atu halo identifikasaun.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here