Kondisaun ponte Bekusi ne’ebé mota sobu durante inundasaun iha kapitál Dili. Imajen TATOLI/António Gonçalves

DILI, 06 abríl 2021 (TATOLI)—Primeiru-Ministru (PM), Taur Matan Ruak, fó ona orientasaun ba Vise Primeiru-Ministru no Ministru Planu Ordenamentu, José Reis no Ministru Obra Públika, Salvador Eugênio Soares dos Reis Pires atu sobu ponte Bekusi no konstrui foun, nune’e labele fó impkatu negativu ba populasaun ne’ebé hela besik mota bainhira akontese inundasaun.

Xefe Governu lembra bainhira halo vizita ba ponte ne’e hafoin akontese inundasaun iha marsu 2020, komunidade sira levanta kestaun atu sobu ponte ne’e tanba kuandu mota tuun lori ai no fatuk ne’ebé bele sobu komunidade nia uma.

“Tinan kotuk ha’u diskute ho Ministru Obra Públika iha posibilidade atu sobu ponte ne’e, maibé seidauk konsege. Ohin ha’u-nia inan-aman sira iha ne’e hakarak atu sobu ne’ebé ha’u fó ona instrusaun ba Vise Primeiru-Ministru no no Ministru Obra Publika, aban ha’u hakarak haree ponte ne’e sobu no halo foun fali,” PM hateten bainhira observa direta kondisaun ponte Bekusi, Becora, tersa ne’e.

Xefe Ezekutivu akompaña ho membru Governu balun no entidade relevante halo observasaun direta ba infraestutura hanesan ponte no estrada ne’ebé hetan estragu grave tanba inundasaun ne’ebé akontese iha domingu (04/04) iha kapitál Dili.

Biban ne’e, PM nota mós katak mota iha Bekusi bee maka’as tanba ne’e bainhira atu halo ponte tenke iha planu di’ak.

“Ponte ida hanesan ne’e halo fali kuartu barak-barak, klaru bee lori ai no fatuk mai taka tiha kuak hodi bee sa’e sobu populasaun nia uma,” nia akresenta.

Tanba ne’e, Xefe Governu husu entidade relevante atu konstrui ponte ne’ebé labele fó risku ba populasaun.

“Ita haree iha Mota Comoro hosi uluk to’o agora, moru sistema protesaun sira monu hotu tanba ita hada fatuk de’it hanesan ema karik ruin laiha halo nusa mak nia bele forte,” nia lamenta.

Maski nune’e, PM lakohi fó sala ba Governu anteriór konstrui infraestutura maibé nafatin halo esforsu hodi kontinua hadi’a infraestrutura públika atu minimiza risku.

“Ha’u hanesan Primeiru-Ministru responsabiliza tomak ba sala hotu no husu deskulpa ba ha’u-nia inan-aman no família sira ne’ebé hela iha área ne’e. Ha’u promete sei baku rahun atu halo fali foun, nune’e tinan oin mai imi labele terus tanba ponte ida ne’e,” Xefe Governu promete.

PM fó solidaridade ba inan-aman sira ne’ebé lakon sasán no uma tanba impaktu hosi inundasaun.

Iha biban hanesan, Abitante afetadu iha Bekusi, Regina Correia, agradese ba vizita PM no fó resposta ba preokupasaun populasaun ne’ebé hakarak hadi’a ponte.

“Ami agradese Primeiru-Ministru tanba hakarak sobu ponte ne’e no halo foun fali, nune’e mota tun karik labele sobu ami-nia uma,” nia agradese.

Tuir nia, durante ponte ne’e harii, populasaune iha área besik mota sempre hetan impaktu bainhira bee sa’e tanba lori fatuk no ai belit hotu iha ponte hodi bee halai tama ba komunidade nia uma.

“Ami iha ne’e terus liu ona tanba ponte ne’e ami lakon sasán no uma, inklui fó ameasa mós ba ami-nia vida,” nia hatutan.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here