IGE kontinua normaliza hikas estrada no ponte ne’ebé hetan estragu tanba inundasaun. Imajen TATOLI/António Gonçalves

DILI, 19 abríl 2021 (TATOLI)Prezidente Konsellu Administrasaun Fundu Infraestrutura (KAFI) no atuál Vise Primeiru-Ministru (PM) no Ministru Planu Ordenamentu, José Maria dos Reis, konvoka reuniaun hamutuk ho ajénsia sira ne’ebé trata asuntu infraestrutura hodi rona relatóriu provizóriu hosi ekipa téknika sira.

Iha enkontru ne’e, KAFI haree relatóriu hamutuk ho ekipa téknika, ne’ebé estabelese iha semana kotuk liubá tuir despaisu Primeiru-Ministru (PM), Taur Matan Ruak, ho misaun atu identifikasaun, klasifikasaun, no kuantifikasaun projetu sira ne’ebé hetan estragu hosi inundasaun iha domingu (04/04).

“Sira halo levantamentu estragu iha Dili ho montante privizóriu hamutuk millaun $45, maibé planu rekuperasaun ne’e ho kustu millaun $200-resin ba ponte no estrada balun ne’ebé mak kotu, maibé seidauk finál. Tanba ne’e maka eziji atubele tun lalais ba munisípiu atu foti dadus nune’e bele hatene lalais kustu totál ba rekuperasaun ne’e hira,” Prezidente KAFI relata, hafoin ramata reuniaun, iha salaun Ministériu Finansa, Aitarak-laran, segunda ne’e.

Ekipa téknika halo levantamentu ba estragu hosi komunidade nia hela fatin no infraestrutura públika sira.

Governante ne’e dehan, tuir planu hahú aban (tersa) ekipa teknika sira sei arranka bá munisípiu hodi halo levantamentu dadus estragu kauza dezastre naturál, ne’ebé sira foin atu dezloka tanba daudaun ne’e iha hela implementasaun Serka Sanitária nune’e presiza autorizasaun hosi Sala Situasaun Sentru Integradu Jestaun Krize (CIGC, sigla portugés).

“Ekipa téknika sira sei tun hotu ba terrenu atu foti dadus sira ne’ebé foin hetan estragu tanba udan boot foin lalais, nune’e bele hatene loloos kustu no valór ba rekuperasaun,” Ministru subliña.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here