Primeiru-Ministru, Taur Matan Ruak, hamutuk ho entidade relevante observa direta estrada protokolu Praia dos Coqueiros ne’ebé hetan estragus hosi dezastre naturál, tersa (06/04/21). Imajen Tatoli/Egas Cristóvão.

DILI, 14 abríl 2021 (TATOLI)-Ekipa task force hosi Diresaun Nasionál Obra Públika, Ministériu Obra Públika (MOP) no Ajénsia Dezenvolvimentu Nasionál (ADN) finaliza no aprova ona dezeñu no Bill of Quantity (BoQ) hodi hadi’a estrada protokolu iha Praia dos Coqueiros, iha Embaixada Japaun nia oin ne’ebé kotu tanba inundasaun iha domingu (04/04).

Diretór Nasionál Estrada, Ponte no Kontrola Cheia, João Mário Gama de Sousa, hateten daudaun ne’e ekipa téknika finaliza ona serbisu no sei aprezenta iha enkontru Komisaun Administrasaun Fundu Infraestrutura (KAFI).

“Ita finaliza no indika ona kompañia tolu, ne’ebé sei aprezenta ba enkontru KAFI atu deside kompañia ida atu halo normalizasaun urjente ba estrada ne’ebé kotu iha Embaixada Japaun nia oin,” Diretór Nasionál ne’e informa ba Agência TATOLI, via telefónika, kuarta ne’e.

Notísia relevante: PM orienta MOP-ADN mobiliza kompañia normaliza estrada iha Embaixada Japaun oin

Ekipa mós halo ona estimasaun kustu rekuperasaun no kandidatu kompañia ne’ebé sei ezekuta obra maibé seidauk bele fó sai tanba sei hein aprezentasaun iha sesta (16/04) no desizaun iha KAFI.

“Ita indika ona kompãnia maibé naran labele fó sai tanba hein desizaun KAFI no ba kustu ne’e kuaze $300.000, maibé detallu liu hein desizaun atu tempu besik bele halo ona retensaun,” nia hatutan.

Ekipa téknika hosi liuhosi Diresaun Jerál Obra Públika hamutuk ho ADN koordena hosi Diretór Jerál Obra Públika, Rui Hernani.

Ekipa task force estabelese bazeia ba orientasaun hosi Primeiru-Ministru, Taur Matan Ruak, hafoin observa direita ba estragu infraestututra Estadu.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here