DILI, 29 marsu 2021 (TATOLI)-Prezidente Partidu Kongresu Nasionál Rekonstrusaun Timorense (CNRT), Kay Rala Xanana Gusmão, segunda ne’e, tuku 08:50 Otl, marka prezensa iha Edifísiu Prokuradór Jerál Repúblika (PGR, sigla Portugés) hodi ba hatán notifikasaun hosi Ministériu Públiku nian hanesan testemuña
Notísia Relevante : MP arrola hela faktu kona-ba keixa Mari Alkatiri nian
Lider Karizmátiku hetan notifikasaun hosi MP relasiona ho keixa ne’ebé hatama hosi Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri, kontra membru Bankada CNRT iha Parlamentu Nasional ho mós keixa balun kona-ba alegasaun hosi Komisaun Politika Nasional (CPN) CNRT nian.
Iha loron 18 janeiru 2021, Sekretáriu Jerál FRETILIN, Mari Alkatiri, presta deklarasaun iha Ministériu Públiku (MP) kona-ba keixa tolu ne’ebé antes ne’e nia parte hatama ba MP.
Iha fali loron 07 jullu 2020, Mari Alkatiri, hatama ona keixa dahuluk ba Ministériu Públiku hasoru membru CPN-CNRT kona-ba akuzasaun simu subornu hosi kompañia ConocoPhillips.
Notísia Relevante : Marí Alkatiri Hato’o Ona Keixa Ba MP Kontra Membru CPN-CNRT
Membru CPN-CNRT antes ne’e liuhosi konferénsia imprensa no mós halo publisidade liuhosi órgaun komunikasaun sosiál sira, hodi aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Mari Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Mari Alkatiri ho montante osan millaun $2.5.
Iha loron 06 novembru 2020, Mari Alkatiri, hato’o keixa ba Ministériu Públiku (MP) hodi kontra deputadu bankada CNRT hamutuk na’in-21.
Kay Rala Xanana Gusmão, komandante Em-Xefe FALINTIL to’o iha edifísiu Prokuradoria Jerál Repúblika (PGR), Colmera, Dili, ho karreta prado xapa matrikula A.15.519 akompaña hosi eskolta hafoin tama kedas edifísiu laran hodi hein presta deklarasaun.
Notísia Relevante : Mari Alkatiri presta deklarasaun iha MP
Tuir observasaun Agência Tatoli nian daudaun iha edifísiu PGR nian nota katak prezensa Xanana Gusmão nian iha PGR hetan seguransa maka’as hosi Komandu Polísia Munisípiu Dili, Korpu Seguransa Polísia (CSP) iha edifísiu PGR nia oin nune’e mós to’o mai iha area Mandarin ninian.
Marka mós prezensa mós kuadru partidu CNRT sira ne’ebé hatais kamiza mutin ho fotografia Xanana nian nu’udar apoiu solidariedade ba Xanana Gusmão.
Polísia asegura seguransa
Komandu Polísia Nasionál Timor-Leste liuhosi Korpu Seguransa Pesoál (CSP), Batallaun Orden Públiku (BOP), Unidade Tránzitu Dili, asegura seguransa másimu ba lider Karizmátiku, Kay Rala Xanana Gusmão, hodi presta nia deklarasaun iha edifísiu PGR, Colmera, Dili.
Xanana Gusmão ho nia eskolta no karreta privadu to’o iha área PGR iha oras 8:50, asiste direita hosi Komandante PNTL Dili, Superintendente Xefe, Henrique da Costa, Segundu Komandante PNTL Dili, Superintendente, Euclides Belo.
Segundu Komandante PNTL Dili, Euclides Belo, rekoñese prezensa polísia nian iha terrenu hodi asegura seguransa, tanba iha terrenu ekipa apoiante Xanana Gusmão barak maka partisipa hodi hatudu sira nia solidariedade.
Parte PNTL hahú okupa seguransa iha área Colmera, Estrada Igreja Katedrál Dili, Bebora, Mandarin no Jardin Bebora nian, ne’ebé tuir planu sei utiliza hodi sai fatin konferénsia imprensa ne’ebé Xanana rasik sei halo hodi ko’alia ba jornalista sira.
Observasaun Agência Tatoli nian mós nota, apoiante Xanana Gusmão, kuaze 100-liu maioria utiliza kamiza Xanana Gusmão nian ne’ebé hakerek slogan rezisténsia Viva Xanana Gusmão no seluk tan.
Jornalista : Nelson de Sousa/Eugénio Pereira
Editór : Francisco Simões
