DILI, 18 janeiru 2021 (TATOLI)-Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri, ohin, presta deklarasaun iha Ministériu Públiku (MP) kona-ba keixa tolu ne’ebé antes ne’e nia parte hatama ba MP.
Iha loron 07 jullu 2020, Mari Alkatiri, hatama ona keixa dahuluk ba Ministériu Públiku hasoru membru Konsellu Polítika Nasional (CPN) partidu CNRT kona-ba akuzasaun simu subornu hosi kompañia ConocoPhillips.
Konteúdu hosi karta prosesu sijual ne’ebé la mensiona maibé hosi keixa ne’e hosi CPN-CNRT hahú hosi Vise Presidente Virgílio Smith to’o mai kraik.
Notísia Relevante : Marí Alkatiri Hato’o Ona Keixa Ba MP Kontra Membru CPN-CNRT
Membru CPN-CNRT antes ne’e liuhosi konferénsia imprensa no mós halo publisidade liuhosi jornais, hodi aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Mari Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Mari Alkatiri hamutuk millaun $2.5.
Iha loron 06 novembru 2020, Mari Alkatiri, hato’o keixa legal ba Ministériu Públiku (MP) hodi kontra deputadu bankada CNRT hamutuk na’in-21. Prosesu keixa krime hodi kontra bankada CNRT hosi xefe bankada to’o kraik, tanba ko’alia la loos agora.
Mari Alkatiri, la esplika detallu ba públiku kona-ba konteúdu keixa tanba sei iha segredu justisa iha ona MP tanba ne’e hodi hein prosesu ne’e la’o ba oin.
Nia fó hanoin keixa ne’e relasiona ho Deputadu Bankada CNRT hala’o deklarasaun ida iha bankada liu hosi konferénsia imprensa ne’ebé temi nia parte ne’ebé laiha fundamentu.
Iha loron 18 dezembru 2020, Mari Alkatiri hato’o keixa ba MP hodi kontra sidadaun na’in-haat hanesan Abílio Abrantes de Araújo, José Luis Guterres, Rogério Tiago Lobato ho Abílio Araújo nia kaben Guilhermina Lobo Araújo ne’ebé nia konsidera halo akuzasaun falsu hasoru nia kona-ba operasaun Skylight 1978.
Notísia Relevante : Operasaun Skyligth, Alkatiri hatama keixa ba MP kontra Rogério Lobato Cs
Mari Alkatiri hato’o keixa ne’e tanba konsidera akuzasaun sira-ne’e laloos hodi rekorre ba MP buka lia loos.
Mari Alkatiri to’o iha edifísiu Prokuradoria Jerál Repúblika (PJR), Colmera, iha tuku 8:46 Otl, ho karreta prado xapa matrikula 03.999G akompaña hosi eskolta hafoin tama kedas edifísiu laran hodi hasoru prokuradór Matias Soares presta deklarasaun.
Hafoin remata presta deklarasaun ba jornalista, Mari Alkatiri, esklarese, nia mai fó depoimentu ba MP ho nia konteúdu substánsia relasiona ho keixa tolu ne’ebé antes ne’e hatama ba MP.
“Ba ha’u prosesu ne’e tenke ba oin no sei la hakiduk no sei iha tan prosesu balun atu tama,” hateten Mari Alkatiri.
Nia afirma, durante presta deklarasaun aprezenta mós dokumentu ka evidénsia hodi aprezenta tan ba iha MP, tanba ne’e hodi hein prosesu ne’e ba oin no parte sira prepara aan hodi notifikasaun hodi defende aan.
Jornalista : Nelson de Sousa
Editór : Francisco Simões
