Sekretáriu Jerál Partidu FRETILIN, Marí Alkatiri. Imajen/ Egas Cristovão

DILI, 07 jullu 2020 (TATOLI)-Sekretáriu Jerál Partidu Frente Revolusionária Timor-Leste Independente (FRETILIN), Marí Bin Amude Alkatiri, ohin, hato’o ona keixa legal ba Ministériu Públiku hodi kontra akuzasaun sira hosi membru  Komisaun Polítika Nasional (CPN) partidu CNRT nian.

Notísia Relevante : Aban, Alkatiri Keixa Membru CPN-CNRT Ba Ministeriu Públiku

Iha semana hirak liubá membru CPN-CNRT liuhosi konferénsia imprensa no mós halo publisidade liuhosi jornais sira, hodi aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Marí Bin Amude Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Mari Alkatiri hamutuk millions $2.5.

Marí Alkatiri, to’o iha edifísiu Prokuradór Jerál Repúblika  (PGR, sigla portugés) iha Colmera, Dili, iha tuku 9:58 Otl,  ho karreta marka Prado,  xapa matrikula A.21-208 ne’ebé akompaña hosi korpu polisia seguransa pesoál, Ahamad Alkatiri nu’udar Mari Alkatiri nia maun, Nurima Alkatiri, nu’udar Mari Alkatiri nia-oan feto ho nia Advogadu privadu José Guterres no Advogadu Arlindo Sanches.

Prezensa Marí Alkatiri nian iha PGR akompaña mós hosi membru Comite Central FRETILIN (CCF) balun ne’ebé sira hotu hakat ba meza protokolu Gabinete PGR nian no hasoru malu direta ho PGR José Ximenes. Nune’e, ekipa advogadu ho Mari Alkatiri entrega diretamente dokumentu relevante sira hodi hatama keixa ba PGR nu’udar na’in ba asaun penal nian.

Marí Alkatiri esklarese ba jornalista sira katak  nia prezensa iha PGR ka Ministériu Públiku hanesan sidadaun baibain atu reklama ba Estadu kona-ba nia direitu naran di’ak, dignidade no direitu atu ema labele kontinua ataka tanba bainhira laiha baze hodi tenta diskrimina  nia iha media sosiál no mídia mainstream ka mídia konvensionál sira.

“Agora buat sira ne’e komesa aumenta boot ba beibeik hatudu ba maluk sira hakarak labele abuza demais ha’u nia toleránsia, tanba lei iha no justisa tenke funsiona,” afirma Marí Alkatiri.

Marí Alkatiri hatutan, nia parte halo keixa ne’e hasoru  membru CPN-CNRT hahú hosi Vise Prezidente CNRT Virgílio Smith to’o mai hirak ne’ebé halo asina iha dokumentu sira akuzasaun hasoru nia.

Jornalista   : Nelson de Sousa

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here