Presidente Konfederasaun Sindikatu Timor-Leste (KSTL), Almerio Vila Nova. Imajen Tatoli/Jogerjo Guterres.

DILI, 02 marsu 2021 (TATOLI)—Prezidente Konfederasaun Sindikatu Timor-Leste (KSTL), Almeiro Vila Nova, husu ba Governu liuhosi Ministériu Koordenadór Asuntu Ekonómiku (MKAE) atu halo revizaun ba lei traballadór liuliu kona-ba saláriu mínimu  tanba tinan-neen ona la halo revizaun.

Notísia Relevante: “Saláriu Mínimu $115, Labele Dignifika Traballadór Nia Moris”

“Ami  husu ba Governu atu aselera esbosu saláriu mínimu liuliu ba iha MKAE tanba tinan neen nia laran saláriu mínimu seidauk hetan revizaun. Ida-ne’e hanesan violasaun boot ida ba direitu traballadór sira-nian. Tanba, tuir regulamantu, kada tinan rua (2) tenke ita hetan revizaun maibé hosi 2014 mai to’o 2021 (tinan neen resin ona) Governu la fó atensaun ba salariu mínimu traballadór sira entaun seidauk iha mudansa ba saláriu,” Almeiro Vila Nova hateten ba Agênsia TATOLI iha nia knaar fatin, Bemori, Dili, tersa ne’e.

Nia dehan, Governu presiza halo revizaun tanba situasaun traballadór nian iha pandémia COVID-19 ne’e, rendimentu ne’ebé mak sira hetan la sufisiente tanba laiha balansu ho nesesidade iha sira-nia uma laran.

Tanba ne’e, nia husu ba Governu atu aselera revizaun saláriu mínimu ne’ebé Governu halo ona akordu labele impede, tanba dala barak saláriu mínimu sai problema boot ba traballadór sira.

Aleinde ida-ne’e, Prezidente KSTL ne’e mós husu ba emprezáriu sira katak iha situasaun pandémia COVID-19 ne’e mantein nafatin respeita direitu traballadór sira hodi labele hapara traballadór sira.

“Ami husu ba parte empregadór sira hotu katak iha situassaun pandémia COVI-19 ne’e nia laran, empregadór sira labele hapara traballadór sira. Maske situasaun ekonómia ne’ebé ladun di’ak ba setór privadu sira maibé empegadór sira tenke mantein nafatin, relasaun servisu ne’ebé di’ak ho traballadór sira no nafatin respeita direitu fundamental traballadór sira nian, ne’ebé mak regula ona iha lei númeru 4/2021,” nia subliña.

Nune’e mós, nia mós apela ba emprezáriu sira atu aplika prosedura hosi Ministériu saúde (MS) nian kona-ba prevensaun COVID-19, tanba ne’e fó nafatin materiál prevensaun COVID-19 nian ho gratuita ba traballadór sira, nune’e bele evita transmisaun hosi ema ba ema.

Notísia Relevante: SEFOPE Sei Análiza Proposta Revizaun Saláriu Mínimu Bazeia ba Rejiaun

Polítika Mudansa Saláriu Mínimu Seidauk Bele Aprezenta iha KM

Jornalista: Arminda Fonseca

Editór: Cancio Ximenes

 

HAKEREK NO HATÁN

Please enter your comment!
Please enter your name here