Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristóvão

DILI, 10 jullu 2019 (TATOLI)-Polítika ba mudansa saláriu mínimu to’o agora seidauk bele aprezenta iha Konsellu Ministru (KM) tanba iha kestaun tekniku balun ne’ebé presiza atu haree.

“Ami sei haree kestaun ida ou rua, ne’ebé mak sei prejudika, bainhira ekipa tékniku sira hetan ona montante, mas ha’u rasik mak sei pendente hela,” informa Sekretáriu Estadu Formasaun Profisionál no Empregu (SEFOPE), Julião da Silva, ohin, Caicoli, Dili.

SEFOPE sei hatún despaxu ida ba ekipa atu bele muda fali polítika saláriu mínimu ne’e bazeia ba rejiaun no la aplika ein jerál tanba saláriu mínimu ne’e $115 no ida ne’e kuaze aplika ba munisípiu 13 hotu.

Julião fó ezemplu katak bainhira ema ida loke loja ida iha Dili no seluk iha Maliana no entre loja rua ne’e haree nia movimentu ida ne’ebé mak barak liu. Loja iha Dili nia movimentu barak, mas saláriu ne’ebé selu ba traballadór ne’e $115. Hanesan mós iha Maliana selu $115 tanba de’it ta’uk lei, mas movimentu ema mai sosa labarak.

“Razaun seluk, funsionáriu loja iha Dili ne’e nia kustu moris ne’e karun liu. Razaun sira ne’e maka ami haruka halo ezersísiu filafali. Ita hakarak bá Konsellu Ministru dala ida diskute para bá Parlamentu hotu ona, la’ós ba tiha mak ita dehan ne’e sala tiha, ladún di’ak ita hadi’a fali,” hateten Sekretáriu Estadu Julião da Silva.

Atubele haruka ba KM, Julião dehan, depende ba ekipa tripartida ne’ebé mai husi setór privadu, sindikatu traballadór, Ministériu Finansa liuliu Diresaun Jerál Estatístika, no SEFOPE nian ne’ebé daudaun serbisu hela ba polítika ida ne’e.

Atubele muda saláriu mínimu tuir rejiaun sei buka ema independente ou universitáriu ida hodi halo peskiza hodi aprezenta dadus loloos para define saláriu mínimu, maibé ida ne’e depende ba tékniku sira.

Julião dehan, saláriu mínimu bazeia ba rejiaun ne’e di’ak liu, no daudaun ekipa halo hela ezersísiu nune’e seidauk determina tempu bainhira mak atu lori bá KM.

“Depende ekipa serbisu lalais, lori mai, ami haree husi ókulu polítika loos ona, ita bá,” tenik Julião da Silva.

Notísia relevante :http://www.tatoli.tl/2019/05/sefope-espera-politika-ba-mudansa-salariu-minimu-aprova-iha-junu/

Jornalista         : Maria Auxiliadora

Editór               : Francisco Simões

1 KOMENTÁRIU

  1. Atu sujere de’it ba SEPFOPE katak, se di’ak liu tan ita bo’ot sira kria tan lei traballu Part Time atu nune’e fasilita ita nia joven balun bele fahe tempu ba eskola no serbisu.

HAKEREK NO HATÁN

Please enter your comment!
Please enter your name here