Sekretáriu Estadu Formasaun Profesionál no Empregu (SEFOPE), Julião da Silva. Imajen/Egas Cristovão.

DILI, 30 setembru 2019 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, hatete Konsellu Nasionál Traballu hamutuk ho empregadór no traballadór inklui sindikatu sira aprezenta ona proposta revizaun saláriu mínimu.

“Sira finaliza no entrega ona mai ha’u, maibé ha’u sei fó hela sujestaun atu analiza saláriu mínimu bazeia rejiaun ka kustu vida, ne’ebé sira aseita ha’u-nia sujestaun ha’u avansa ba Konsellu Ministru”, Sekretáriu Estadu dehan iha knaar fatin Kaikoli, ohin.

Razaun bazeia ba rejiaun, nia dehan tanba traballadór ne’ebé servisu iha munisípiu seluk nia kustu vida la hanesan ho traballadór ida iha Dili ne’ebé iha nesesidade barak.

Julião relata sobre proposta husi Konsellu Traballu katak saláriu mínimu 200, maibé presiza diskute. “Ita fó ezemplu saláriu mínimu agora $115, ne’e iha Dili tenke liu ida ne’e tanba custo de vida la hanesan”, katak.

Iha diskusaun, Julião da Silva, salienta saláriu mínimu ba kada rejiaun sei la hanesan, maibé seidauk publika tanba Konsellu Ministru seidauk haree no aprova.

Nia afirma posibilidade proposta revizaun saláriu mínimu aprezenta iha Konsellu Ministru iha tinan ne’e, bainhira Konsellu Nasionál Traballu servisu maka’as.

SEFOPE hakarak finaliza lalais ona revizaun saláriu mínimu jerál hodi tama fali ba proposta saláriu mínimu bazeia ba méritu ka profisionál.

“Ita finaliza saláriu mínimu jerál, ita diskute fali saláriu mínimu bazeia ba méritu. Tanba ita labele halo revizaun hela de’it, presiza haree mós empregadór sira-nia kbiit”, tenik.

Notísia relevante : Polítika Mudansa Saláriu Mínimu Seidauk Bele Aprezenta iha KM

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here