iklan

NASIONÁL, HEADLINE

“Saláriu Mínimu $115, Labele Dignifika Traballadór Nia Moris”

“Saláriu Mínimu $115, Labele Dignifika Traballadór Nia Moris”

Presidente Konfederasaun Sindikatu Timor-Leste (KSTL), Almerio Vila Nova. Imajen Tatoli/Jogerjo

DILI, 8 agostu 2019 (TATOLI) – Prezidente Konfederasaun Sindikatu Timor-Leste (KSTL), Almerio Vila Nova, hateten tuir pezkiza ne’ebé KSTL halo ona, saláriu mínimu $115 iha Timor-Leste labele dignifika traballadór nia moris.

Nia dehan, bazeia pezkiza KSTL iha  2013, ho kalkulasaun no análiza ida ne’ebé mak naruk, konsege determina katak traballadór sira konsidera bele moris diak iha fulan ida nia laran ho saláriu mínimu $200.

“Kalkulasaun ne’e bazeia ba padraun mínimu ba ema ninia moris, tanba ne’e kalkulasaun ba montante $200, signifika traballadór sira ne’ebé simu saláriu $115 ne’e, ita bale nota katak ida ne’e labele ona atu bele dignifika sira nia moris iha fulan ida nia laran”, nia tenik ba Agência TATOLI, iha ninia k’naar fatin, Santa Cruz, kinta ne’e.

Tuir Almerio, KSTL nu’udar organizasaun sumriña ba sindikatu setorál sira ne’ebé mak eziste iha Timor-Leste no durante ne’e ninia k’naar halai liu ba asuntu polítiku ne’ebé iha relasaun ho área laborál.

“Ami nia programa ne’ebé mak importante durante ne’e mak halo influensia polítika ba  Governu ninia polítika, liliu iha saláriu mínimu”, nia akresenta.

Nia nota katak saláriu mínimu durante tinan lima resin ona mak Governu seidauk halo revizaun.

“Ida ne’e tristeza boot ida ba movimentu sindikatu nian tanba tuir akordu, Governu halo revizaun ba saláriu mínimu iha 2014 no iha akordu ne’e loloos kada tinan rua, maibé ein felizmente seidauk iha revisaun ba saláriu mínimu”, nia lamenta.

Nune’e, organizasuan ne’e kontinua luta hodi hato’o ba Governu atu ho seriedade bele halo revizaun lalais ba saláriu mínimu nasionál.

“Ami mós rekomenda ba Governu atu bele kria mós regulamentu ba saláriu mínimu sektorál no saláriu mínimu munisípiu nia. Ida ne’e mak sai baze importante ne’ebé KSTL kontinua luta hela”, nia afirma.

Nune’e mós, nia dehan ba munisípiu tenke estabelese saláriu ketak, tanba ema nia moris iha distritu ho sidade boot ka kapitál ne’e la hanesan. “Iha munisípiu baratu liu kompara moris iha kapitál nasaun”.

Nia hatutan: “Iha mós kompañia balun  kestiona tanba rendimentu iha distritu  sira menus liu iha kapitál, entaun ita tenke halo difersa saláriu iha nível munisípiu nomós iha nível kapitál, se lae bele prejudika ema hotu mai moris iha kapitál”.

Jornalista: Julia Chatarina

Editór: Xisto Freitas

iklan
iklan

2 Comments

  1. Salário 115 ne Kiik liu, governo tenke halo estudo ho assessment ba ekonomia rai laran maka bele deside salário mínimo ba Nia sidadaun sira. Labele deside arbiru tamba setor privado too agora tau salário tuir sira nia hakarak i trabalhadores mak sai vítima nafatin.

  2. Ita timor ne bot sira hnoin ba sira nia kabun d8 maibe povo kiik ho salariu nb 115 ne la suficiente ida ,,,,pelumenus governo halo revizaun ba lei ne hodi aumenta sae ba 200 minimu mb ita timor ne bot sr simu osn fulan2 stabil…too balun kaer projecto no balun hetan tan suborno no balun halo fali partispisaun ekonomika nb nudar povo sujere ba governo lalika kaer governo hodi habokur d8 fmilia hnoin netik ami povo na halerik ne ,,,,,ita hare deputadu sira d8 sra na knar nudsr deputadu mb sr balun ms kaer projecto hotu ….timor ne sra mk iha poder ita povo ne vitima nftin d8 ,,,,agora ukun ne ms sabraut soke malu tun sae dezenvolvimento laiha liu orsamento 2020 no 2021 ne ezekuta oinsa ita povo iha baze la sente ….

Leave a Reply

iklan
error: Content is protected !!