Postu Administrativu Fatumean, Munisípiu Covalima. Imajen Tatoli/Eugénio Pereira

COVALIMA, 24 fevereiru 2021 (TATOLI) – Komunidade Postu Administrativu Fatumean, Munisípiu Covalima, daudaun ne’e, moris haksumik iha ida-idak nia horik-fatin hodi evita transmisaun peste letál COVID-19.

Membru Unidade Patrullamentu Fronteira no FALINTIL-FDTL halo seguransa másimu hodi blokeia movimentu abitante iha Aldeia Klauhalek, Suku Belulik Leten, Postu Administrativu Fatumean, Munisípiu Covalima. Imajen Tatoli/Eugénio Pereira

Iha loron-rua nia laran de’it, tersa-kuarta (23-24/02), ekipa vijilánsia saúde tenke evakua ema na’in-neen (6) hosi Fatumean, tanba identifika pozitivu COVID-19. Nune’e, autoridade sira deside kedas hodi blokeia movimentu ka “lockdown” iha Fatumean atu ajuda salva komunidade hosi propagasaun peste letál ne’e ne’ebé iha poténsia boot prejudika povu nia vida.

Notísia Relevante : Abitante sira viziñu ho pasiente COVID-19 iha Fatumean submete fali ba re-teste

Oinsá mak COVID-19 bele sai ona hanesan “zombie ka buan” ne’ebé hata’uk komunidade Fatumean? Tuir informasaun hosi Sala Situasaun-Sentru Integradu Jestaun Krize (SS-CIGC) no Ekipa Vijilánsia Saúde katak   peste letál ne’e importasaun hosi nasaun viziñu Indonézia liuhosi abitante balun ne’ebé kontinua hakur fronteira terrestre ilegálmente.

Jeografikamente Suku Belulik -Leten baliza ho Suku Foho Eka- Laktutus, Wedomu-Indonézia no distánsia kilómetru tolu de’it. Nune’e  iha Aldeia Belulik Kraik no Aldeia Fatumea, baliza ho  Wedomu, Lamak Neen-Indonézia ho distánsia kilómetru 15.

Notísia Relevante : PN husu izola komunidade suku Fatumea ne’ebé konfirmadu COVID-19

Ekipa Médiku transporte abitante na’in-neen ne’ebé pozitivu COVID-19 iha Aldeia Klauhalek, Suku Belulik Leten, Postu Administrativu Fatumean, Munisipiu Covalima ba Dili. Imajen Tatoli/Eugénio Pereira

Postu Administrativu Fatumean pertense ba Suku Nano, Belulik Leten no Fatumea ho aldeia hitu (7), maka hanesan Tradukama, Makokon, Mane Kiik, Klauhalek, Bee Lulik Kraik, Fatumea no Mota Ulun ho totál abitante 4.286.

Informasaun ne’ebé Agência Tatoli rekolla hosi autoridade seguransa sira no autoridade lokál  iha area jurisdisaun Fatumean, katak  posivel boot tebes abitante sira ne’ebé pozitivu COVID-19 iha Fatumean  halo kontaktu direita ho nia maluk ka nia família nasaun viziñu iha baliza rai-maran TL-Indonézia tanba komunidade parte rua hela iha liña fronteira halo to’os besik-malu loos.

Administradór Postu Administrativu Fatumean, Filomeno Cardoso, informa abitante sira ne’ebé sofre COVID-19 nu’udar agrikultór ne’ebé hela de’it iha toos-laran. tanba ne’e, dala-ruma sira halo kontaktu klandestina ho abitante viziñu Indonézia.

Notísia Relevante : Pasiente pozitivu COVID-19 iha Fatumean aumenta tan rua

Ekipa Médiku sira evakua obrigatóriu ho abitante sira ne’ebé pozitivu COVID-19 iha Postu Administrativu Fatumean, Munisípiu Covalima ba Dili. Imajen Tatoli/Eugénio Pereira

“Ita husu informasaun sira la temi sai. Sira la onestu, maibé sira durante ne’e hela iha toos de’it, ita bele deskonfia sira halo kontaktu ho abitante sira Indonézia nian ne’ebé halo toos besik malu ho sira,” Filomeno Cardoso haktuir ba Agência Tatoli iha Fatumean, Covalima, kuarta ne’e.

Administradór Postu ne’e koordena ho xefe suku no xefe aldeia hodi alerta ba populasaun sira atu koopera hodi halo secreening  sedu ba sira-nia saúde hodi evita transmisaun lokál. Nune’e, rezultadu hatudu duni iha ona transmisaun lokál iha Fatumean.

Situasaun COVID-19, ohin loron, bele dehan duni hanesan “buan” boot ida ne’ebé hata’uk ema ua’in iha mundu rai-klaran. Abitante sira hosi nasaun avansadu no rikeza barak mak mate ona tanba COVID-19 ne’e.

COVID-19 hanesan mehi-aat ne’ebé izola mundu no izola abitante sira nia liberdade atu la’o goza sira-nia vida hosi nasaun-ida ba nasaun-seluk no hosi rai-ida ba rai-seluk.

Tuir publikasaun Agência Reuters, 21 dezembru 2020, katak Korea du Sul hanesan mós nasaun ida ne’ebé ho númeru ema mate aas no barak tebes tanba COVID-19. Ho númeru ema mate ne’e lori risku boot no hatodan sistema atendimentu  saúde iha rai ginseng ne’ebá hodi obriga autoridade Polísia halo operasaun ba fatin sira ne’ebé la kumpre ba regra saúde públiku.

Agência notísia ne’ebé nia sede iha Londres, Reinu Unidu ne’e informa mós katak Agência de Controle e Prevenção de Doenças Korea hateten, ema ne’ebé mate iha Korea  na’in 698.

Hosi sorin seluk, rai ka nasaun sira avansadu hanesan Italia, Estadu Unidu Amerika, Japaun, no rai lubun iha kontinente Afrika, halo esforsu  hosi loron ba loron atu minimiza propagasaun COVID-19 ne’ebé mós hamate ona sira-nia abitante lubun.

Sita hosi publikasaun Wordometers, to’o loron 15 outubru 2020, Estadu Unidu Amerika mós rejista nia abitante hamutuk 221.823 maka mate tanba COVID-19.

Kazu propagasaun Coronavirus ka COVID-19 iha mundu to’o ohin loron, seidauk hatudu nia progresu diminui nia númeru.  Dadus iha fulan outubru 2020 nian hatudu purvolta ema tokon 38 iha mundu sofre COVID-19  no hosi númeru ne’e ema tokon ida maka mate no tokon 29 rekupera.

 Nasaun 10 ne’ebé ho númeru kazu boot

1.    Estadu Unidu Amerika

Total kazu : 8.1148. 253

Mate         : 221.823

2.    Brazil

Total kazu : 5.141.498
Mate         : 151.779

3.   India

Total kazu : 7.305.070
Mate         : 111.311

4.   Méxiku

Total kazu :   825.340
Mate         : 84.420

5.    Reinu Unidu 

Total kazu : 654.644
Mate         : 43.155

6.    Italia 

Total kazu :  372.799
Mate         : 36.289

7.    Peru

Total kazu   : 856.951
Mate           : 33.512

8.    Espanyol

Total kazu : 937.311
Mate         : 33.413

9.    Fransa

Total kazu :  779.063
Mate         : 33.037

10. Iran 

Total kazu : 513.219
Mate         : 29.349

Jornalista        : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here