COVALIMA, 24 fevereiru 2021 (TATOLI)- Pasiente pozitivu COVID-19 iha Aldeia Klauhalek, Suku Belulik Leten, Postu Administrativu Fatumean, Munisípiu Covalima, aumenta tan na’in rua hosi númeru anteriór na’in-haat.
Notísia Relevante : Kazu pozitivu foun haat iha Covalima, posibilidade ‘transmisaun lokál’
Jornalista Agência Tatoli, Eugénio Pereira, ne’ebé akompaña ekipa vijilánsia saúde hala’o screening masál iha Postu Administrativu Fatumean, kuarta ne’e, relata hosi Fatumean katak, dadus ne’ebé ekipa vijilánsia saúde rekolla hosi rezultadu screening hatudu pasiente na’in-rua pozitivu COVID-19 tan.
Pasiente hirak ne’e, tuku 09:00, ohin, ekipa Ministériu Saúde ho Sala Situasaun Sentru Integradu Jestaun krize (SS-CIGC), transporta ona hosi sira-nia horik fatin iha Suku Fatumea ba Covalima atu lori liu mai sala Izolamentu iha Dili.
Ekipa Saúde deteta sira-nia sintoma liuhosi rezultadu screening ne’ebé foti amostra iha loron 20 fevereiru 2021.
Ekipa vijilánsia epidemiolojia kontinua buka tuir ema sira ne’e ninia kontaktu ne’ebé identifika katak sira iha kontaktu direta ema na’in 29 (membru família na’in-13 ho viziñu sira na’in-16).
Ekipa Saúde sira mós lori ai-moruk dezinfeta hodi rega hale’u uma ne’ebé família sira hela hodi evita moras ne’e hada’et ba abitante sira seluk.
Notísia Relevante : Fatumean “lockdown”, kazu pozitivu foun haat
Tuir observasaun iha terrenu nota, ekipa forsa PNTL no F-FDTL kontinua asegura seguransa másimu ba movimentu iha Covalima.
Jornalista : Eugénio Pereira
Editór : Francisco Simões
