Ekipa Médiku sira transporta ona abitante na’in neen (6) kompostu hosi feto haat (4) no mane (2) rua ne’ebé halo teste swab pozitivu COVID-19 iha Aldeia Klauhalek, Suku Belulik Leten, Postu Administrativu Fatumea, Munisipiu Covalima, ba Dili. Imajen Tatoli/Eugénio Pereira.

DILI, 24 fevereiru 2021 (TATOLI)—Reprezentante Povu iha Uma Fukun Parlamentu Nasionál rekomenda halo izolamentu ba komunidade suku Fatumea ne’ebé konfirmadu ba propagasaun surtu Coronavirus (COVID-19).

Notísia Relevante: Abitante sira viziñu ho pasiente COVID-19 iha Fatumean submete fali ba re-teste

Membru Parlamentu Nasionál, Deputadu Joaquim dos Santos preokupadu ho kazu COVID-19 tanba ne’e moras ne’e perigu tebes no bele hamate ema maibe sidadaun timoroan balun nafatin dezobdiénsia ba medida Estadu nian.

“Kuandu deteta fatin ida di’akliu ita izola tiha hodi konfirma loloos katak laiha ona katak ita foin loke tanba ita-nia populasaun iha Timor uitoan de’it, transmisaun lokál ka komunitária mak habelar iha Timor laran ne’e ita atu halai ba subar iha-ne’ebé,” nia informa ba jornalista sira iha Parlamentu Nasionál, kuarta ne’e.

Deputada Joaquim lamenta ho komunidade iha área fronteira ne’ebé la kumpre medida prevensaun Estadu Emerjénsia.

“Ita-nia sidadaun balun iha fronteira ne’e dezobediente. Favór ida, ita rona malu. Se hakarak mate, mate mesak. Lalika lori ema seluk ba mate hamutuk,” nia kestiona.

Deputadu Joaaquim husu ba sidadaun hotu tenke rona malu no rona informasaun hosi Governu hodi kumpre medida preventivu sira.

“Ha’u hanoin temporariamente tenke halo izolamentu para Ministériu Saúde bele hala’o nia kna’ar hodi konfirma 100% laiha ona mak bele loke fali, nune’e ita salva interese maioria nian,” Prezidente Komisaun A ne’e fó hanoin.

Nia konsidera problema transmisaun komunitária kontinua eziste tanba sidadaun sira iha fronteira mak lori mai.

“Ita tenke fó respeitu ba ema sira-ne’ebé hala’o kna’ar, hanesan ekipa saúde, seguransa no defeza ne’ebé hala’o kna’ar hodi halo vijilánsia iha área fronteira,” nia alerta.

Prezidente Komisaun A ne’e husu ba komunidade iha área fronteira tenke iha konsiénsia tanba moras ne’e perigu tebes.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here