Ekipa médiku evakua abitante ne’ebé pozitivu COVID-19 iha Aldeia Klauhalek, Suku Belulik Leten, Postu Administrativu Fatumean, Munisípiu Covalima ba Dili. Imajen Tatoli/Eugénio Pereira

COVALIMA, 24 fevereiru 2021 (TATOLI) – Ministériu Saúde no Sala Situasaun Sentru Integradu Jestaun Krize (SS-CIGC), kuarta ne’e, deside halo re-teste ba abitante no família sira ne’ebé hela viziñu ho pasiente COVID-19 iha Aldeia Klauhalek, Suku Belulik Leten, Postu Administrativu Fatumean, Munisípiu Covalima.

Prosesu re-teste ne’e hala’o, hafoin ekipa médiku Ministériu Saúde no SS-CIGC evakua pasiente COVID-19 na’in-neen hosi sira-nia hela fatin iha Fatumean ba Sentru Izolamentu iha Dili.

Pasiente COVID-19 na’in-neen, kompostu hosi feto na’in- haat no mane  na’in-rua ho inisiál SA, JA idózus ho idade tinan 73, labarik ki’ik fulan hitu ho inisiál JB, IA (inan isin rua) no AJ, tinan 36.

Notísia Relevante : Pasiente pozitivu COVID-19 iha Fatumean aumenta tan rua

Xefe Sentru Saúde Komunitáriu Fatumean, Agostinho Amaral, konsidera desizaun Ministériu Saúde hola hodi haruka ekipa médiku halo re-teste liuhosi halo screening  COVID-19 hodi salva abitante sira nia vida hosi risku peste letál  COVID-19.

“Agora ita evakua ona pasiente pozitivu  COVID-19 na’in-neen ba Dili hodi kontinua halo re-teste ba família sira inklui família no viziñu sira hotu para bele deteta karik iha sintoma,” Agostinho Amaral ba jornalista iha, Fatumean, Dili.

Iha loron 20 fevereiru, ekipa médiku hasai ona amostra screening iha  Postu Fatumean hamutuk 329 no na’in-neen pozitivu COVID-19.

Tuir observasaun Agência Tatoli iha terrenu nota, ekipa médiku hahú re-teste ka screening ba COVID-19 ba abitante na’in-29 (membru família na’in-13 no viziñu na’in-16) ne’ebé halo kontaktu ho pasiente pozitivu COVID-19 na’in-neen.

Hafoin foti tiha amostra hirak ne’e, ekipa sei kontinua lori kedas ba Laboratóriu Nasionál Dili hodi halo teste no fó sai rezultadu.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here