Komunidade sira nebe hela besik iha mota ibun area Bebonuk la iha konsensia hodi soe fali Lixu ba iha mota Komoro, Dili 13 Febreiru 2020.Imajen/Antonio Goncalves

DILI, 11 fevereiru 2021 (TATOLI)—Xefe Departamentu Saneamentu Munisípiu Dili, Domingos Soriano, rekuñese ekipa saneamentu Dili labele redús lixu iha área Comoro-Kampung Baru no Beto tanba volume lixu aumenta barak no butuk to’o duut mós moris buras iha laran.

Notísia Relevante: Governu kontinua esforsu halo kontrolu ba lixeiru Tibar

“Ami rekuñese lixu iha Comoro-Kampung Baru no Beto nian ne’e susar atu redús tanba lixu barak mak butuk hamutuk dezde semana ida ona. Lixu iha ne’ebá ne’e, to’o duut moris buras iha lixu ne’e nia laran. Durante ne’e, ami halo monitorizasaun ba fatin rua ne’e, haree katak hahú hosi loron 01 fevereiru to’o horisehik, lixu ne’e sei butuk hamutuk,” Domingos Soriano hateten ba Agência TATOLI iha nia knaar fatin, Matadouro, Dili, kinta ne’e.

Maibé, nia hateten, ekipa sanemaentu Dili kontinua esforsu atu husu apoiu ba karreta hosi kompañia seluk ne’ebé mak rekolla lixu iha Postu Administrativu sira seluk iha Dili atu fó apoiu.

“Ami mós iha ajenda ba fatin ne’e, hodi tama ho kompañia foun nia karreta para bele blokeia tiha foer iha ne’ebá,” nia dehan.

Nia dehan, iha fatin rua ne’e hahú hosi dalan públiku tama to’o beco (gang) ka bairru laran, ekipa rekolla lixu labele akumula hotu tanba área Comoro-Kampung Baru nian ne’e luan depois loza xina nian barak mak kontribui lixu hanesan dos-mamuk, plástiku, no seluk tan.

“Maibé tuir loloos, loza sira-ne’e tenke soe lixu iha lixeira Tibar. Maibé, seidauk iha regra ne’ebé mak garante atu ita fó sansaun ba ema-ne’ebé mak soe lixu arbiru, liuliu ba loza sira iha Kapitál Dili,” nia dehan.

Notísia Relevante: Pesoál saneamentu rekolla lixu tonelada 180 kada loron

Governu Presiza Kria Dekretu-Lei Ida Garantia Selu Taxa Ba Lixu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here