Trabailadores sira raut hela lixu iha Kapital Dili, Kuarta 9 Setembru 2020. Imajen TATOLI/Antonio Goncalves.

DILI, 22 setembru 2020 (TATOLI)–Diretór Nasionál Organizasaun Urbana, Ministériu Adminsitrasaun Estatál (DNOU-MAE), Hermínio Moniz Ribeiro, hatete loron ida pesoál saneamentu raut lixu hamutuk 180 tonelada ho karreta 54 no kada karreta tula dala rua (2) iha loron ida.

Notísia Relevante: DNOU implementa programa pilotu resiklajen iha suku tolu

“Ita-nia pesoál saneamentu sira raut lixu hotu-hotu iha sidade Dili, loron ida bele foti tonelada 180 ho ho karreta 54 no kada karreta tula dala rua (2) iha loron ida,” Diretór DNOU-MAE, Hermínio Moniz Ribeiro, haktuir ba Agência TATOLI iha nia knaar fatin MAE, Colmera, Dili, tersa ne’e.

Nia informa, komunidade sira mak prodús lixu barak liu no lixu sira-ne’e maihosi komunidade, loza, restorante inklui hosi kompañia boot-boot sira mak barak liu, família ka uma-kain sira la dún prodús lixu,” nia dehan. 

Tanba ne’e, nia dehan, presiza iha estratéjia resiklajen ida hodi halo separasaun lixu para fasil foti ka raut lixu nune’e bele hatene loloos lixu ne’e barak ka lae, iha loron ida nia-laran.

“Ita hatene katak lixu ne’e barak mak botir mamuk, plástiku no dos mamuk no lixu matak sira. Tanba hanoin atu implementa estratéjia resiklajen hodi halo separasaun lixu no ita mós bele hetan reseita hosi lixu ne’e,” nia hateten.

Nia esplika, hosi lixu verde sira ita bele halo ba adubu no kalen aat sira esporta ba rai-liur maibé ida-ne’e seidauk bele halo tanba seidauk iha estratéjia resiklajén ida hodi halo separasaun lixu.

Nune’e mós, nia dehan, OJE ba 2021 seidauk iha entaun seidauk bele hala’o atividade hirak ne’e. Bainhira iha ona orsamentu Governu mak hanoin lixu hotu tau tuir nia fatin no fasil ba pesoál saneamentu sira atu raut hodi ba soe iha lixu-fatin Tibar.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here