Ezemplu lixu sira ne'ebé namkari iha kapitál. Imajen Egas Cristovão

DILI, 02 jullu 2020 (TATOLI)–Xefe Departamentu Saneamentu Munisípiu Dili, Domingos Soriano, hateten Governu presiza kria dekretu-lei ida nune’e bele garantia hodi bele selu taxa ba lixu bainhira empreza ruma la kumpre regra ne’ebé mak Governu fó sai ona antes katak empreza sira tenke soe lixu iha Tibar.

“Parte Governu, ha’u sente garantia atu aprova lei ne’e para husu taxa ba negosiante sira maibé lei ne’e dezde hosi 2014 to’o agora seidauk aprova. Foin daudauk iha ona dekretu-lei númeru 2/2017, ida ne’e ko’alia kona-ba sólidu rejidu maibé ninia taxa ne’e ligasaun fali ho EDTL ne’ebé kobransa ne’e halo oin nusá ne’e mak to’o agora seidauk iha solusaun husi EDTL no ministériu relevante hanesan Ministériu Administrasaun Estatal (MAE) halo prosesu ne’e seidauk loos,” dehan Xefe Departamentu Saneamentu Munisípiu Dili, Domingos Soriano, ba Agência TATOLI iha nia servisu fatin, Caicoli, Dili, kinta ne’e.

Nia hateten, Governu fó gratuita durante tinan 10-resin ona ba loza xineza inklui empreza ne’ebé mak halo negósia iha rai ida-ne’e, maibé sira balun kontinua soe foer iha lixu fatin ne’ebé mak Governu prepara ona ne’e.

“Ami enkontru ona ho Prezidente Autoridade ho Diretór Planeamentu Munisípiu Dili iha Metinaro, ami ezije mak tenke halo planu. Ha’u husu para aselera kona-ba taxa ne’e tanba durante ne’e ita gratuita durante tinan 10-resin ona ba ema estranjeiru no ba timoroan ne’ebé halo negosiante bo’ot sira ne’e, ita fó gratuita tebes ba sira. Agora, Governu seidauk iha dekretu lei ida-ne’ebé mak definitivu hodi halo kobransa ba taxa negosiante sira-ne’e,” nia dehan. 

Empreza sira-nia lixu, tuir nia, tenke lori rasik ba soe iha doer-fatin Tibar (Liquiça) maibé iha empreza balun mak kumpre no balun la kumpre, no iha loza xineza balun aluga kareta mak tula sai foer.

“Parte seluk ita haree fatin lixu iha loos loja oin ne’ebé sai ba tau de’it ona. Maibé, tuir loos ne’e na’in rasik lori ba Tibar mak soe iha ne’eba. To’o agora seidauk iha dekretu-lei ruma atu ita-nia negosiante sira atu selu taxa ba lixu ne’e. Seidauk iha regra ka dekretu-lei ida hodi regula tanba sei prosesa hela,” nia esplika.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here