Atividade joven na'in-tolu bainhira hili sasán uzadu hanesan kalen no besi-aat sira-ne’ebé soe iha lixeiru Tibar, sesta (05/02/2021). Imajen TATOLI/António Gonçalves

DILI, 11 fevereiru 2021 (TATOLI)—Xefe Departamentu Saneamentu Munisipiu Dili, Domingos Soriano, hateten Governu liuhosi Saneamentu Munisípiu Dili kontinua esforsu hodi halo kontrolu ba lixu sira iha lixeiru Tibar, atu nune’e ema labele soe lixu arbiru hodi fó impaktu negativu ba komunidade sira-nia saúde.

“Ami la’ós haree de’it atu la hadi’a ne’e lae. Ami esforsu halo kontrolu ba lixu sira bainhira ema soe foer arbiru iha lixeiru. Ema soe arbiru tanba laiha seguransa ne’ebé mak hein to’o kalan, hodi hala’o kontrolu ba fatin ne’e,” Xefe Departamentu Saneamentu Munisipiu Dili, Domingos Soriano, hateten ba Agência TATOLI hodi hatán ba komunidade Tibar sira-nia preokupasaun kona-ba lixeiru Tibar nia impaktu ba sira-nia saúde, iha nia knaar fatin Matadouro, Dili, kinta ne’e.

Notísia Relevante: FDCTL-komunidade Libaulelo lamenta lixu iha Tibar

Nia hatutan, bainhira liu ona tuku 17:00 lorokraik ne’e, ema hotu-hotu tuur hakmatek mak hafoin komunidade balun soe lixu iha dalan ne’ebé mak asesu ba soe feor nian, entaun liuhosi atividade ida-ne’e bele hamosu moras oioin.

Maibé, nia informa, Governu iha mákina rua (eskavadór ho boldozer) ne’ebé mak permanente no asegura iha lixeiru Tibar hodi kee ku’ak hafoin suru hamutuk no hakoi foer hirak ne’e iha rai ku’ak laran no loke dalan foun atu ema bele asesu ba fakar foer.

Hatán ba komunidade Tibar nia preokupasaun kona-ba atu muda lixeiru Tibar ba fatin seluk, nia dehan, Governu iha ona planu no deside ona fatin ida iha Metinaro mak sai lixeiru foun ba Munisípu Dili nian.

“Kona-ba ida-ne’e, ita-nia Governu prepara ona rai Metinaro ne’e ba lixeiru Kapitál Dili nian. Maibé, ita siedauk hatene bainhira mak utiliza tanba desizaun hotu iha Governu nia-liman. Ita hein de’it, tanba buat hotu-hotu sei prosesu hela. Parese tinan oin ita bele ona utiliza lixeiru foun ne’e,” nia relata.

Notísia Relevante: Governu sei halo lixeiru foun hodi antesipa lixieru Tibar nakonu

Jornalista: Osória Marques

Editór: Cancio Ximenes  

HAKEREK NO HATÁN

Please enter your comment!
Please enter your name here