Diretór Operasionál R2M, Mario Guterres. Imajen Tatoli/Nelson de Sousa

DILI, 01 fevereiru 2021 (TATOLI)-Kompañia R2M liuhosi ninia Diretór Operasionál, Mario Guterres,  segunda ne’e, hato’o ona  keixa legál  ba iha  Polísia Sientífika Investigasaun Kriminál (PCIC) kontra Vise-Ministru Interiór (MI), António Armindo.

Keixa ne’e mós hasoru  asesór legál Ministériu Interiór nian, Andre Fernandes ho ekipa servisu Migrasaun no eis asesór  IT  servisu Migrasaun  Christopher Squire tanba kompañia R2M konsidera parte-sira halo akuzasaun hasoru R2M   falsifika ekipamentu Dilitta no impede kompañia foti sasán bainhira kansela tiha kontratu servisu.

Notísia Relevante : R2M husu ANC klarifika razaun la atribui lisensa Internet Service Provider

Aktu impedimentu ne’e, R2M konsidera parte sira iha Ministériu Interiór  halo abuzu podér no burla agravadu.

Diretór Operasionál   R2M, Mario Guterres, esplika, antes ne’e iha 2019  sira manan konkursu públiku  ba iha MI kona-ba projetu border management information system ba iha servisu Migrasaun nian hodi halo fornesimentu (supply) ekipamentu IT.

R2M hahú hala’o servisu ka kumpre orden servisu iha kontratu iha fulan abríl  remata iha setembru 2020, maibé Mario Guterres informa, iha juñu liubá mosu preokupasaun hosi Servisu Migrasaun katak iha ekipamentu informátika balun impresora ba vistu nian ne’ebé Servisu  Migrasaun konfuzaun ho nia espesifikasaun téknika tanba ne’e rejeita ekipamentu sira   ne’e hodi husu justifikasaun hosi R2M nune’e R2M tenta justifika ne’ebé komunika direita karta hosi fábrika nian kona-ba ekipamentu sira sosa hodi klareza loloos.

Notísia Relevante : Arguidu sira hosi R2M IT Solution submete ba PI no arguidu Globalnet nian hetan TIR

“Iha setembru,  besik prazu bainhira atu remata servisu ne’e, Migrasaun tenta nafatin ekipamentu sira hodi blokeia prosesu hotu durante negosiasaun nune’e ikus mai Ministru Interior liuhosi Vise-Ministru ho ninia asesór legál fó paresér katak tenke kansela kontratu ida-ne’e no husu R2M atu fó fila hotu osan ba projetu no kompañia mós atu foti fila-fali ekipamentu ne’ebé  fornese ba iha migrasaun,’’ Mario Guterres hateten ba jornalista sira hafoin hato’o keixa ne’e iha edifísiu PCIC, Colmera, Dili.

Hafoin ne’e problema ne’e parte R2M  tenta  halo aproximasaun atu rezolve tanba prosesu ne’e sei iha inspesaun nia laran, Ministériu Interiór hanesan na’in ba projetu maibé laiha solusaun.

Iha loron 21  dezembru 2020,  Mario Guterres, haklaken, R2M hetan detensaun ba kazu internet ilegál, Vise Ministru António Armindo manda karta unilateralmente kansela projetu refere no obriga R2M atu devolve osan 100% totál  $648 mil prazu loron-15 nia laran.

Notísia Relevante : Kazu internet ilegál, Tribunál aplika TIR ba arguidu sira hosi R2M IT Solution

“Depois ami submete ba primeiru interrogatóriu ba kazu internet iha Tribunál no ikus mai Tribunál aplika TIR ba ami no iha loron 12  janeiru 2021 kompañia ho presaun nia laran tenke devolve fila duni osan ne’e konta bankária operasionál Ministériu Interiór no kona-ba sasán sira ami husu sira la fila-fali,” Mario Guterres hateten.

Nia lia tun tan, R2M hetan impedimentu maka’as no prezuiju kuandu lakon osan naran fo’er iha públiku  ho preokupasaun ida ne’e R2M hato’o keixa ida ne’e hodi buka justisa ne’ebé loloos.

Defensór Públiku, Albino de Jesus Pereira. Imajen Tatoli/Nelson de Sousa

Defensór Públiku, Albino de Jesus Pereira, ne’ebé  fó asisténsia legál ba R2M, hateten, R2M  hola parte iha konkursu públiku no kumpre obrigasaun ba prosesu refere hodi hala’o servisu  hafoin sente iha violasaun ruma hodi hato’o ba  defensoria públiku iha ne’ebé defensoria haree iha indísiu krime ruma prátika hosi Vise- Ministru Interiór rasik, nune’e servisu  defensoria fasilita hato’o keixa ba PCIC hodi bele halo investigasaun karik konsidera krime tenke prosesa tuir dala legál.

Agência TATOLI  halo  ona  esforsu hodi konfirma asuntu ne’e ho Vise-Ministru Interiór, António Armindo iha ninia gabinete, maibé okupadu hela ho servisu seluk.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here