DILI, 24 dezembru 2020 (TATOLI)- Tribunál Distritál Dili (TDD), ohin, tuku 15:00 Otl, halo julgamentu primeira interrogatóriu (PI) ba arguidu na’in-haat hosi kompañia nasionál R2M IT Solution ne’ebé deskonfia iha ligasaun no koñesimentu ba kazu koneksaun internet ilegál hosi rai-li’ur mai Timor-Leste no hamosu prejuizu ba Estadu Timor-Leste.
Notísia Relevante : Arguidu hosi Globalnet submete primeiru interrogatóriu iha Tribunál
Arguidu na’in-haat ho inisiál MG, TXS, KEC ho NPS ne’e kumpre ona detensaun iha sela polísia durante oras 72 nia laran no sira kontinua ba primeira audiénsia julgamentu interrogatóriu ho hatais roupa detidu no liman “kesi-metin” ho aljema (borgol).
Audiénsia julgamentu primeiru interrogatóriu ne’e prezide hosi juis prosesu João Ribeiro no Ministériu Públiku (MP) reprezenta hosi Prokudór Matias Soares, Prokuradora Lidia Soares no arguidu sira hetan asisténsia legál hosi advogadu privadu Manuel Tilman no advogadu privadu ida tan.
Notísia Relevante : R2M husu ANC klarifika razaun la atribui lisensa Internet Service Provider
Iha fatin hanesan iha Tribunal Distritál Dili (TDD), juis titular ba kazu koneksaun internet ilegál, João Ribeiro, liuhosi kontinuasaun julgamentu primeira interrogatóriu aplika Termu Identidade Rezidénsia (TIR) ba arguidu AM hosi kompañia Globalnet Unipesoal Lda.
“Atu ko’alia badak de’it haree ba prova sira ne’ebé sufisiente Tribunál haree medida ne’ebé adekuadu aplika de’it TIR,” Advogadu privadu Acaçio de Almeida ne’ebé fó asisténsia legál ba arguidu AM haktuir ba jornalista sira.
Kona-ba nia kliente AM hetan akuzasaun ba kazu saida? Acaçio de Almeida ne’ebé fasilita asisténsia legál ba AM la ko’alia tanba sei iha prosesu segredu justisa nian. Nia dehan de’it katak hotu-hotu akompaña nafatin to’o bainhira julgamentu normál mak bele hatene iha akuzasaun kompletu.
Notísia Relevante : SIKN buska no halo apreensaun ba dokumentu ho materiál ANC nian
Jornalista : Nelson de Sousa
Editór : Francisco Simões
