Argiuidu na'in-haat hosi kompañia R2M IT solution partisipa iha primeira audénsia interrogatóriu iha TDD, 25 dezebmru 2020. Imajen Tatoli/Nelson de Sousa

DILI, 25 dezembru 2020 (TATOLI)–Tribunál Distritál Dili (TDD) liuhosi desizaun julgamentu primeiru interrogatóriu, ohin, aplika  Termu Identidade Rezidénsia (TIR) ba arguidu sira hosi kompañia Nasionál R2M IT Solution na’in-haat ho inisiál  MG, JXS, KEC ho NPS.

Notísia Relevante : Arguidu sira hosi R2M IT Solution submete ba PI no arguidu Globalnet nian hetan TIR

Komandu Polísia Nasionál Timor-Leste liuhosi Servisu Investigasaun Kriminál Nasionál (SIKN)  iha loron 21 dezembru 2020, detein  arguidu IT na’in-haat (4) hosi kompañia R2M IT Solution ne’ebé deskonfia envolve iha kazu ligasaun internet ilegál iha Timor-Leste.

Arguidu na’in-haat hosi kompañia Nasionál, R2M IT Solution ne’e SIKN aplika detensaun flagrante delitu iha sira-nia servisu fatin, R2M IT Solution, Hudi-Laran, Dili.

SIKN halo mós investigasaun ba sentru dadus ka  data center kompañia R2M IT Solution hodi halo apreensaun ba matéria sira hanesan, Teleport ida, Teleport simu liña internet ida, laptop rua inklui print-out dadus sira ne’ebé ligadu ho prosesu fornese internet nian durante ne’e.

Hafoin halo tiha investigasaun, parte SIKN dada kedas fita police line hodi taka metin fatin data center hodi asegura to’o prosesu investigasaun remata.

Ekipamentu sira ne’ebé SIKN deteta durante ne’e kompañia R2m utiliza hodi halo koneksaun liña internet ilegál hosi satellite Kapasific Singapura hodi fornese mai Timor-Leste, no kompañia ne’e mós la rejistu ninia legalidade iha internasionál.

Durante halo investigasaun, SIKN deteta mós kompañia R2M durante ne’e la rejistu ninia identidade iha Autoridade Nasionál Komunikasaun (ANC) hodi hetan lisensa internet supply provider.

Arguidu sira, Ministériu Públiku (MP) akuza ho krime tolu hanesan burla informátika agravadu ne’ebé previstu iha artigu 269, brankamentu kapitais ne’ebé previstu iha artigu 213 no  krime favoresimentu pesoál ne’ebé previstu iha artigu 290  hotu-hotu hosi kódigu penál Timor-Leste.

Prosesu julgamentu  ne’e la’o oras lubuk ida hahú hosi   sesta (24/12),  tuku 15:00  Otl, to’o ba iha tuku 20:20  Otl, hodi suspende fila-fali no kontinua  fila-fali  sesta ohin (25/12), tuku 14:00 Otl,  no termina iha tuku 19:00  Otl.

Iha faze alegasaun parte Ministériu Públiku husu Tribunál atu aplika prizaun preventiva ba arguidu sira no defeza husu TIR.

Hafoin remata audiénsia julgamentu  primeiru interrogatóriu ne’e, Advogadu Manuel Tilman ne’ebé fó asisténsia legál  ba arguidu sira hateten, Tribunál aplika TIR tanba promosaun prova ne’ebé aprezenta hosi Ministériu Públika laiha indísiu forte.

“Ha’u hanoin desizaun Tribunál nian  justu,” hateten Manuel Tilman.

Ho desizaun Tribunál nian hodi aplika  TIR ne’e ba arguidu sira no sira  sei aprezenta aan kada fulan iha loron segunda-feira,  tuku 09:00 Otl iha TDD.

Ba arguidu ho inisiál  KEC  nu’udar sidadaun Singapura hanesan mós investidór kuandu hakarak halo viajen ba nia rain tenke mai husu autorizasaun ba iha Tribunál hafoin bele sai.

Mezmu Tribunál aplika ona TIR, maibé hosi parte Ministériu Públiku nu’udar na’in ba asaun titular penál kontinua rekolla prova hodi bele aprezenta ba Tribunál iha julgamentu komún ka normal iha tempu tuir mai.

Audiénsia julgamentu primeiru interrogatóriu ne’e prezide hosi juis prosesu João Ribeiro  no Ministériu Públiku (MP) reprezenta hosi Prokudór Matias Soares, prokuradór Ambrosio Rangel ho Prokuradora Lidia Soares no arguidu sira hetan asisténsia legál hosi advogadu privadu na’in-rua; Manuel Tilman ho Ismael Assunção Lopes.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here