Parte família sira akompaña suspeitu hosi kompañia R2M IT Solution ne’ebé SIKN halo investigasaun iha Komandu Jerál PNTL, Caicoli, Dili. Imajen Tatoli/Eugénio Pereira

DILI, 22 dezembru 2020 (TATOLI)- Kompañia Nasionál R2M IT Solution husu ba Autoridade Nasionál Komunikasaun (ANC) atu halo justifikasaun  no klarifikasaun ba razaun saida mak ANC to’o agora seidauk atribui  lisensa Internet Service Provider (ISP) ka liña fornesimentu rede internet, maske sira-nia kompañia prenxe ona rekizitu.

Notísia Relevante : SIKN detein tan suspeitu ida no taka data center Globalnet

Reprezentante kompañia R2M IT Solution nu’udar mós suspeitu ho inisiál MG perante submete ba investigasaun polísia nian deklara, sira-nia kompañia durante ne’e halo proposta lisensa ba parte ANC para atu hetan lisensa ISP, maibé to’o agora parte ANC abandona tiha sira-nia proposta hodi halo sira sai vítima.

Kompañia R2M IT Solution hahú aprezenta sira-nia proposta ne’e ba parte ANC iha kedas juñu to’o 20 dezembru 2020, maibé to’o agora ANC la fó deklarasaun ruma.

“Ami prontu koopera nafatin ho parte justisa, maibé ami husu ba  parte ANC tenke justifika razaun tanba saida maka la fó lisensa Internet Service Provider ne’e, tanba to’o agora ANC nonook tiha hodi abandona ami nia atividade, no halo ami sai tiha vítima,” Suspeitu MG informa ba jornalista iha bainhira submete ba investigasaun polónia nian iha edifísiu Servisu Investigasaun Kriminál Nasionál (SIKN), Caicoli, Dili.

Suspeitu MG hatutan, parte tékniku ANC rasik durante ne’e konsidera sira nu’udar parseiru servisu ne’ebé importante hodi fó asisténsia ba sistema servisu ba atendimentu liña internet ho kualidade, maibé parte ANC rasik to’o agora foin fó lisensa ba Kompañia Operadór Telekomunikasaun tolu hanesan, Timor Telekom, Telemor no Telkomcel no abandona tiha kompañia seluk ne’ebé prienxe oan rekejitu hosi ANC.

Notísia Relevante : Internet ilegál, SIKN detein tan suspeitu na’in-haat

Nia afirma, karik  ANC iha razaun fundamentu katak durante ne’e sira halo avaliasaun ba kompañia nia performance servisu la tuir rekizitu  ruma tenke deklara hodi fó suspensaun provizóriu ba kompañia sira hodi evita parte SIKN halo asaun buska hasoru sira-nia kompañia.

“Se ANC haree katak, ami seidauk prienxe rekizitu ruma, ANC bele suspende ami nia atividade provizóriu. Se haree katak, ami nia prezensa ne’e legál, ANC bele fó sertifikadu provizóriu para labele prejudika ami nia servisu,” nia hateten.

Suspeitu MG ne’e husu mós ba públiku atu labele julga ka fó sala ba kompañia sira, tanba sira rasik sai vítima, tanba de’it servisu ANC ne’ebé la sériu atu fó asisténsia servisu ne’ebé di’ak.

Daudaun ne’e kompañia R2M IT Solution fó servisu ba traballadór Timor-oan hamutuk ema na’in-30. Kompañia ne’e mós durante ne’e fornese hela rede internet ba kompañia privadu sira balun iha Dili.

SIKN deteta kompañia halo koneksaun liña internet ilegál hosi satellite Kapasific Singapura hodi fornese mai Timor-Leste, no kompañia ne’e mós la rejistu ninia legalidade iha internasionál no iha ANC.

Observasaun Agência Tatoli notak, durante prosesu investigasaun ba suspeitu na’in haat hosi kompañia R2M IT Solution ho inisiál, MG, JXS, KEC no NPS akompaña direita hosi Advogadu Privadu Manuel Tilman no parte família ne’ebé hatudu solidariedade.

To’o notísia ne’e públika, Agência Tatoli tenta halo konfirma kestaun ne’e ba parte ANC seidauk bele fó komentáriu, tanba seidauk hetan autorizasaun hosi Ministériu Transporte no Komunikasaun (MTK).

Jornalista   : Eugénio Pereira

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here