SIKN ezekuta mandadu detensaun TDD ba jestór prinsipál Telemor (imajen I) ho jestór prinsipál Elite Computer (imajen II) iha Dili, segunda (23/11/2020). Imajen Tatoli/Eugénio Pereira

DILI, 01 fevereiru 2021 (TATOLI)-Tribunál Rekursu (TR) liuhosi akórdaun altera medida koasaun hodi liberta jestór prinsipál kompañia Elite Computer ho inisiál DP  ho jestór prinsipál operadór Telekomunikasaun Telemor ho inisiál  TVB  hosi prizaun preventiva.

Iha loron 28 novembru 2020, Tribunál Distritál Dili (TDD) liuhosi desizaun primeiru interrogatóriu aplika medida koasaun prizaun preventiva ba  arguidu na’in-rua tanba iha indísiu envolve iha kazu koneksaun internet ilegál iha Timor-Leste.

Notísia Relevante : Kazu Telemor-Elite Computer, MP akuza arguidu-sira ho krime burla informátika no fraude fiskál

Parte defeza liuhosi advogadu privadu Pedro Apariçio,  ne’ebé fó asisténsia legál ba arguidu sira la konkorda ho desizaun ne’e, nune’e halo rekursu ba iha Tribunál Rekursu kontra desizaun  primeiru interrogatóriu Tribunál primeira instánsia.

“Despaxu Tribunál Rekursu (TR)  halo alterasaun ba medida koasaun ba medida prizaun preventiva ne’ebé hasai ona  desizaun  iha loron 29 janeiru 2021, nune’e  arguidu sira   sai ona hosi prizaun preventiva,” Pedro Aparaçio informa ba Agência TATOLI iha Dili, segunda ne’e.

Notísia Relevante : SIC detein jestór prinsipál Telemor ho Elite Computer

Nia esplika, ho alterasaun ne’e arguidu sira sai imediatu hosi prizaun preventiva no arguidu sei  aprezenta an iha polísia kada semana no halo apreensaun ba arguidu sira nia pasaporte nune’e labele halo viajen ba estranjeiru  hodi koopera ho prosesu justisa.

Pedro Apariçio, dehan tuir entendimentu TR nian ba desizaun primeiru interrogatóriu TDD nian  antes ne’e todan liu tanba prosesu ne’e sei iha inkéritu  arguidu sira sei inosente, nune’e TR haree laiha dalan atu aplika koasaun prizaun preventiva.

Nia hatutan,  arguidu sira mós hanesan jerente ka jestór ba kompañia Telemor ho Elite Computer no prosesu hotu kona-ba fiskál ka impostu durante ne’e sira kumpre obrigasaun hodi selu ba Estadu.

Notísia Relevante : SIC “paraliza” koneksaun fibra ótika Telemor no Elite Computer

Jornalista   : Nelson de Sousa  

Editór        : Francisco Simões

   

 

HAKEREK NO HATÁN

Please enter your comment!
Please enter your name here