SIC ezekuta mandadu detensaun TDD ba jestór prinsipál Telemor (imajen I) ho jestór prinsipál Elite Computer (imajen II) iha Dili, segunda (23/11/2020). Imajen Tatoli/Eugénio Pereira

DILI, 23 novembru 2020 (TATOLI)-Komandu Polísia Nasionál Timor-Leste (PNTL) liuhosi Servisu Investigasaun Kriminál (SIC) ezekuta mandadu buska no detensaun hosi Tribunál Distritál Dili ba jestór prinsipál operadór telekomunikasaun Telemor ho inisiál TVB no jestór prinsipál  Elite Computer ho inisiál DP.

Mandadu detensaun hosi TDD. Imajen Tatoli/Eugénio Pereira

Mandadu detensaun TDD nian ne’e ho númeru NUK 0166/20/PNSIC hodi halo mós primeiru interrogatóriu iha Tribunál Dili.

Suspeitu jestór prinsipál Telemor TVB ne’e, SIK halo detein iha ninia servisu fatin Telemor, CBD 4- Timor Plaza    iha  tuku 15:00 Otl.

Hafoin halo tiha detesaun, ekipa SIC halo kedas esplikasaun ba konteúdu karta detesaun hosi Tribunál nian ba suspeitu no ekipa funsionáriu tomak, inklui halo investigasaun ba sistema ka data center  no sistema Call Center Telemor nian iha CBD-2 Timor Plaza.

Suspeitu DP nu’udar jestór prinsipál ida iha Elite Computer, SIC halo detensaun iha ninia servisu fatin iha Colmera, Dili, iha tuku 14:45 Otl.  Hafoin halo tiha detensaun, ekipa SIC hamutuk ho ekipa Technology Information (IT)  halo apreensaun  hodi husu password ba kontrolu ba sistema data center ne’ebé deskonfia durante kompañia Elite Computer utiliza hodi halo koneksaun sistema rede satélite ilegál hosi Atambua-Indonézia nian.

Ezekusaun mandadu buska detensaun hala’o direita hosi Komandante Servisu Investigasaun Kriminál (SIC), Superintendente Xefe, José Maria Neto Moc akompaña hosi ekipa investigadór SIC no hetan apoiu hosi Servisu Informasaun Polísia (SIP).

Suspeitu na’in-rua, TVB no DP deskonfia halo korrelasaun servisu ba malu hodi fasilita utiliza internet ilegál ne’ebé uza satélite Indonézia nian ho kapasidade 600MBS ne’ebé fasilita ba liña ministériu sira inklui Komandu Polísia Nasionál Timor-Leste (PNTL).

Impaktu hosi servisu korrelasaun entre suspeitu na’in-rua hodi fasilita servisu internet ilegál ne’ebé SIC deteta hahú kedas hosi tinan 2012 mai to’o tinan 2018 fó prezuiju ba Estadu Timor-Leste lakon osan barak.

Ho hahalok suspeitu na’in-rua ne’e, Ministériu Públiku akuza suspeitu-sira komete kazu burla informátika no kazu fraude fiskál.

Durante ne’e, kompañia Elite Computer maka manan konkursu halo koneksaun internet ilegál hodi halo korrelasaun servisu ho suspeitu TVB, maibé parte Governu Timor-Leste liuhosi Autoridade Nasionál Komunikasaun (ANC) ne’ebé hetan fasilidade priviléjiu hosi Estadu Timor-Leste la halo kontrolu ba servisu kompañia rua ne’ebé fó prejuizu ba Estadu Timor-Leste.

Tuir dadus ne’ebé Agência Tatoli rekolla, kompañia Elite Computer servisu hamutuk ho Komandu Jerál PNTL hodi halo ligasaun internet koneksaun ba sistema kontrolu Closed Circuit Television (CCTV) iha sidade Dili no postu integradu liña fronteira terrestre.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here