Jestór prinsipál operadór telekomunikasaun Telemor ho inisiál TVB no DP nu’udar jestór prinsipál kompañia Elite Computer submete ona ba audiénsia primeiru interrogatóriu iha Tribunál Distritál Dili, kinta (26/11). Imajen Tatoli/Nelson de Sousa

DILI, 26 novembru 2020 (TATOLI)-Jestór prinsipál operadór telekomunikasaun Telemor  ho inisiál TVB no DP nu’udar jestór prinsipál kompañia Elite Computer, ohin, submete ona ba audiénsia primeiru interrogatóriu iha Tribunál Distritál Dili.

Notísia Relevante : SIC detein jestór prinsipál Telemor ho Elite Computer

Iha audiénsia  ne’ebé prezide hosi Juiza Ercila da Costa ne’e, Ministériu Públiku reprezenta hosi Prokuradór Matias Soares no Prokuradora Lidia Soares, akuza arguidu na’in-rua ho krime burla informátika ne’ebé previstu no punidu iha artigu 268 no krime fraude fiskál  ne’ebé previstu iha artigu 314  kódigu penál Timor-Leste.

Audiénsia julgamentu ne’ebé halo maratona ho durasaun tempu oras 10 nia laran seidauk bele iha desizaun tanba to’o ona tuku 21:00 Otl, Juiza prosesu adia fali ba sesta aban, tuku 15:00  Otl, hodi rona desizaun.

Prosesu julgamentu primeiru interrogatóriu ne’e hahú iha tuku 10:30 dadeer Otl to’o meudia tuku 14:00 Otl, tama ba intervalu no kontinua fali iha tuku 15:30  Otl to’o tuku  21:00 Otl.

Notísia Relevante : SIC sobu sistema koneksaun rede internet hosi Elite Computer iha Balibo

“Desizaun adia ba aban tuku 15:00 Otl, hodi rona desizaun,” Advogadu privadu, Pedro Aparício lia tun ba jornalista-sira hafoin audiénsia julgamentu.

Polísia Nasionál Timor-Leste (PNTL) liuhosi Servisu Investigasaun Kriminál  (SIC) detein  arguidu TVB iha ninia servisu fatin CBD-4, Timor Plaza, Dili no arguidu DP detein  iha  ninia servisu fatin Elite Computer iha Colmera, Dili, iha loron 23 novembru 2020  no arguidu-sira kumpre ona detensaun iha sela polísia durante oras 72.

Prosesu ne’e deskonfia  arguidu-sira halo korrelasaun servisu ba malu hodi fasilita utiliza internet ilegál ne’ebé uza satélite Indonézia nian ho kapasidade 600MBS hodi fornese ba liña ministériu balun, inklui Komandu Jerál Polísia Nasionál Timor-Leste.

Notísia Relevante : SIC “paraliza” koneksaun fibra ótika Telemor no Elite Computer

Ba kazu ne’e, SIC deteta hahú kedas hosi tinan 2012 mai to’o tinan 2018 ne’ebé konsidera fó prezuiju ba Estadu Timor-Leste lakon osan barak.

Prosesu julgamentu ne’e arguidu na’in-rua hetan asisténsia legal hosi advogadu privadu Pedro Aparício, Ligia Araújo no advogadu internasionál Duarte Carneiro.

Notísia Relevante : Deskonfia, prezidente ANC iha relasaun ho ligasaun internet ilegál

Jornalista   : Nelson de Sousa

Editór        : Francisco Simões  

HAKEREK NO HATÁN

Please enter your comment!
Please enter your name here