Ekipa SIC lori suspeitu TVB nu’udar jestór prinsipál kompañia Telemor ba servisu fatin Telemor iha Plaza SBD-2 no SBD-4 iha Timor Plaza, Dili, hodi halo identifikasaun no hamate koneksaun liña transmisaun fibra ótika entre Telemor ho Elite Computer. Imajen Tatoli/Eugénio Pereira

DILI, 25 novembru 2020 (TATOLI)- Polísia Nasionál Timor-Leste liuhosi ekipa Servisu Investigasaun Kriminál Nasionál (SIC), ohin, kontinua halo investigasaun kle’an ba iha servisu fatin kompañia Telemor nian iha CBD-2 no CBD-4 iha Timor Plaza, Dili, hodi “paraliza” ka hapara tomak servisu koneksaun fibra ótika  entre Telemor ho Elite Computer.

Notísia Relevante : Polísia tesi rede koneksaun internet Elite Computer ba liña ministériu balun

Iha prosesu identifikasaun ne’e, parte IT-sira identifika mós kompañia ida ho naran Lifetech ne’ebé halo ligasaun servisu direita ho Telemor hodi fornese internet ho kapasidade 350MB.  Nune’e, ohin, IT deskobre katak, totál koneksaun rede internet ilegál ne’ebé tama hosi Indonézia mai Timor-Leste liuhosi Telemor hamutuk 1GB ne’ebé fó prejuizu ba Estadu Timor-Leste.

Iha prosesu identifikasaun ba data service ne’e, ekipa SIC akompaña hosi IT Profisionál Timoroan ida hamutuk ho ekipa husu direita prosesu servisu rede koneksaun ligasaun Data Center Telemor ne’ebé halo koneksaun antes ona entre parte-rua.

Hafoin halo tiha identifikasaun ba sistema ne’e, ekipa print-sai kedas dadus hotu- hotu  kona-ba koneksaun rede internet entre parte-rua nu’udar evidénsia ida ba SIC hodi enkamiña ba Ministériu Públiku.

Suspeitu TVB  nu’udar jestór prinsipál  Telemor nian akompaña direita hosi ninia Advogadu Privadu, Pedro Aparicio hatudu kolaborasaun di’ak no fó esplikasaun detalladu kona-ba servisu-sira hala’o.

Antes ne’e, SIC tesi-kotu uluk ona fiu sistema koneksaun data center Kompañia Elite nian ne’ebé liga ba liña ministériu-sira, inklui hamate mós sistema rede koneksaun internet hosi Kompañia Elite Computer nian ne’ebé mota iha tore Telemor iha área Postu Administrativu Balibo Vila, Munisípiu Bobonaro.

Ekipamentu-sira ne’ebé SIC sobu hanesan Microwave ida no Access Point ida ne’ebé kompañia Elite Computer mota iha tore kompañia Telekomunikasaun Telemor nian hodi halo ligasaun koneksaun rede internet ho kompañia Indonézia nian ida ho naran, PT-NAP ne’ebé lokaliza iha Atambua-Indonézia hodi fornese liña internet ilegál hosi Indonézia ba Elite Computer hodi fornese tutan ba Telemor.

SIC kontinua aprofunda investiga ba jestór prinsipál  Elite Computer nian ho inisiál DP ne’ebé oras ne’e iha ona sela detensaun SIC-PNTL, Caicoli, Dili.

 Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here