Diretora Programa Nasionál Dezenvolvimentu Suku (PNDS), Claudina Soares Pinto. Imajen TATOLI/Osória Marques.

DILI, 18, janeiru 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten lista ema kbiit laek ka feto faluk sira-ne’ebé atu sai benefisiáriu ba programa “Uma Kbiit Laek” (UKL) ne’ebé PNDS simu ne’e, komunidade sira mak sei foti desizaun sé mak elizível no la elezível.

Notísia Relevante: Semana oin, Governu sensibiliza programa konstrusaun “Uma Kbiit Laek” ba komunidade

Claudina Soares Pinto informa, maske iha benefisiáriu elezível balun mak uluk hela iha Timor-Leste ho kondisaun ekonómia la sufisiénte maibé hafoin ba servisu iha rai-li’ur ho hetan rendimentu ne’ebé boot liu diretór sira-nian, entaun Governu sei konsidera la elizível ona tanba nia la prenxe kritéria PNDS nian.

“Iha ema balun mak uluk hela iha Timor-Leste ho kondisaun ekonómia la sufisiénte maibé hafoin ba servisu iha rai-li’ur ho hetan rendimentu ne’ebé boot liu diretór sira-nian, entaun ne’e Governu konsidera la elizível ona tanba nia la prenxe kritéria PNDS nian. Maske ema ne’e sai vítima pasada ba violasaun direitu umanu ka ema defisiénsia ruma, maibé la tama kategoria kbiit laek mak sei la hetan uma kbiit laek. Tanba programa ne’e ba ema-ne’ebé laiha duni kbiit no tama duni kritériu haat PNDS nian,” Claudina Soares Pinto, hateten ba Agência TATOLI iha nia knaar fatin, Colmera, Dili, foin lalais ne’e.

Entretantu, CNC rekomenda ba PNDS atu halo mós kritériu bae ma vulneravel sira, diretora ne’e hatán, PNDS simu duni lista hotu hosi sira maibé desizaun la’ós maihusi semináriu ne’ebé Programa Nasionál Dezenvolvimentu Suku (PNDS) hala’o ona iha tinan kotuk.

Maibé, nia dehan, ba suntu ida-ne’e PNDS sei koopera ho entidade hotu-hotu hanesan Ministériu Saúde (MS), Sekratáriu Estadu Igualdade Inkluzaun (SEII), Sekretáriu Estadu Protesaun Sivíl (SEPS), no ema ho defisiénsia sira, no bainhira manuál aprovadu ona mak sei tama ba faze implementasaun Uma Kbiit Laek nian.

Nia hateten, Governu liuhosi PNDS konsidera nafatin lista feto-faluk nian hosi CNC maibé atividade hotu la’o tuir siklu Sekretariadu PNDS nian ne’ebé la’ós PNDS mak deside maibé komunidade mak deside.

Diretora ne’e haktuir, lista sira ne’ebé iha PNDS nia liman ne’e, la garantia hotu atu hetan Uma Kbiit Laek ne’e tanba PNDS mak deside maibé PNDS hanesan matadalan no komunidade iha terrenu mak deside katak ema ne’e elezível ka benefisiáriu ba programa refere.

Nia hateten, prosesu tomak ba programa Uma Kbiit Laek ne’e ekipa independente ne’ebé kompostu hosi komunidade, parte igreja nian, Konsellu Suku inklui Unidade Polísia Suku sira mak sei haree hamutuk kona-ba asuntu ne’e.

Lista ema kbiit laek ne’e, nia dehan, bazea ba PNDS nia kritériu haat (4) mak hanesan kondisaun uma, kondisaun ekonómia, jeografikamente no kondisaun fíziku. Tuir nia, kondisaun hirak ne’e mak PNDS hatuur iha manuál mak guia komunidade sira, katak sé mak sai benefisiáriu elizível ne’e konserteja tuir duni kondisaun ne’ebé mak iha.

Notísia Relevante: Konstrui “Uma Kbiit Laek”, PNDS simu lista sobrevivente hosi CNC

CNC ezije PNDS estabelese kritériu konsidera mós ba ema vulneravel

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here