Diretora Programa Nasionál Dezenvolvimentu Suku (PNDS), Claudina Soares Pinto. Imajen Tatoli/Egas Cristovão

DILI, 13 janeiru 2021 (TATOLI)—Diretora Programa Nasionál Dezenvolvimentu Suku (PNDS), Claudina Soares Pinto, hateten atu konstrui “Uma Kbiit Laek” ne’e  PNDS mós simu lista sobrevivente sira hosi Centro Nacional Chega (CNC) besik ema na’in-70.

Notísia Relevante: PNDS realiza treinamentu matadalan “Uma Kbiit Laek” ba DD sira

“Atu konstrui ‘Uma Kbiit Laek’ ba ema kbiit laek sira iha territoriu laran tomak, ami (PNDS) mós simu lista hosi Centro Nacional Chega (CNC) besik ema na’in-70 ne’ebé mak tama iha kbiit laek nian ne’ebé mak identifikadu hetan violasaun iha tempu pasadu nian,” Claudina Soares Pinto hateten ba Agência TATOLI hafoin hala’o abertura treinamentu kona-ba matadalan ka manauál implementasaun ba “Uma Kbiit Laek” iha salaun Komisaun Nasionál Eleisaun (CNE, sigla portugés), Colmera, Dili, kuarta ne’e.

Nia hatutan, hosi dadus hirak ne’e, ekipa Programa Nasionál Dezenvolvimentu Suku (PNDS) halo uluk pilotu ida mak hafoin deside hamutuk ho komunidade sira iha terrenu iha territóriu laran tomak.

“Ami sei halo teste pilotu katak dadus ne’e kondis ho kondisaun reál ne’ebé mak iha ka lae. Dadus ne’e, CNC mak propoin maibé hanesan ita hotu hatene katak implementasaun ne’e sei uza regra PNDS nian. PNDS sei la deside katak halo duni iha ne’e ka lae, ne’e fila-fali ba komunidade. Entaun, lista hirak ne’e ami sei kompilla ba suku sira depois mak suku sira mak haree fali,” Claudina hateten.

Bainhira PNDS simu lista hosi CNC, nia informa, PNDS verifika iha lista balun iha suku ne’ebé mak mensiona ona ho naran ne’e maibé lista ne’e la kondis ho situasaun reál. Ezemplu, naran balun iha lista ne’e dehan nia hela suku ida hanesan ne’e maibé agora nia la hela ona iha nia fatin tanba halo ona servisu ida iha rai liur. Entaun ho ida-ne’e, ita presiza verifika tanba naran hanesan ne’e la tama ba kategoria kbiit laek ona, maske pasadu nia hetan duni violasaun ka sai vítima ba funu,” nia dehan.

Tanba, nia hateten, rekezitu ne’ebé mak Programa Nasionál Dezenvolvimentu Suku (PNDS) estabelese mak haree ba kondisaun uma, rai inklui ho kondisaun ekonómia ba ema kbiit laek ida-nia kondisaun moris loro-loron nian.

“Iha parte seluk, ita haree hosi ema kbiit laek ne’e, karik nia feto-faluk mak hela ho família entaun ema refere la prenxe kritériu PNDS nian. Entaun, haree fila-fali ba sustentabilidade uma ne’e rasik. Tanba bainhira nia ona laiha entaun aban bainrua mate tiha se mak atu uza fali uma ne’e, entaun maizumenus ema ne’e tenke iha oan rua hanesan ne’e para hela kontinua uza Uma Kbiit Laek ne’e,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here