Jestór prinsipál hosi empreza Guardamor ho inisál EBS tama ba audensia julgamentu iha TDD ho hatais roupa detidu no liman futu metin ho aljema ka borgol. Dili, 17 janeiru 2021. Imajen Tatoli/Nelson de Sousa

DILI, 17 janeiru 2021 (TATOLI) – Jerente  prinsipál na’in-rua hosi empreza nasionál Guardamor ho inisiál EBS no  Metrolink  ho inisiál JJDRC, domingu ne’e, partisipa iha julgamentu primeira interrogatóriu iha Tribunál Distritál Dili (TDD) hodi kumpre ba mandadu detensaun hosi TDD ho númeru NUC.0166/20/PNSIK.

Jerente  prinsipál Guardamor no Metrolink ne’e submete ba primeiru interrogatóriu iha TDD hafoin detein iha sela polísia durante oras 72 nia laran, hanesan detidu ba kazu ne’ebé deskonfia involve iha fornesimentu internet ilegál.

Notísia Relevante : Kazu internet ilegál, jestór na’in-rua hosi Liran TECK sai arguidu

Jerente prinsipál hosi empreza nasionál Guardamor ho inisiál EBS partisipa iha audensia julgamentu iha TDD kona-ba kazu internet ilegál. Dili, 17 janeiru 2021. Imajen Tatoli/Nelson de Sousa

Jerente na’in-rua, hanesan Timor-oan koñesidu iha mundu emprezariál ne’e toba iha sela polísia hodi tau roupa detidu no bainhira ba partisipa iha audiénsia julgamentu iha TDD sira-nain rua nia liman futu-metin ho aljema (borgol) no hetan seguransa hosi membru Polísia Servisu Investigasaun Kriminál (SIKN).

EBS ho JJDRC sai arguidu iha Lei nia oin liuhosi akuzasaun Ministériu Públiku nian  nu’udar na’in ba asaun penal.

Polísia Nasionál Timor-Leste (PNTL) liuhosi Servisu Investigasaun Nasionál (SIKN) ezekuta mandatu detensaun hosi Tribunál Distritál Dili (TDD) ho númeru NUC 0166/20/PNSIK, iha loron 14 janeiru 2021 ba jerente Metrolink ho inisiál JJDRC iha edifísiu Hudi Laran no jerente empreza Guardamor ho inisiál  EBS iha edifísiu Fatuhada, Dili.

Notísia Relevante : Kazu internet ilegál, TDD aplika aprezentasaun periódika bá arguidu sira hosi UNITECH

SIKN mós halo buska no apreensaun ba dokumentu balun hanesan laptop rua hosi empreza  rua ne’e no dokumentu empreza nian balun tan.

Hafoin ne’e polísia tau kedas police line iha fatin ne’ebé deskonfia uza ba ligasaun internet hodi asegura prosesu investigasaun.

Prosesu julgamentu primeiru interrogatóriu ne’e prezide hosi juis prosesu Albertina Neves no Ministériu Públiku (MP) reprezenta hosi prokuradór Ambrosio Rangel, Lidia Soares no arguidu sira hetan asisténsia legál hosi advogadu privadu Manuel Tilman.

Notísia Relevante : Kazu internet ilegál, Tribunál aplika TIR ba arguidu sira hosi R2M IT Solution

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here