TDD. Imajen Tatoli /Dok

DILI, 09 janeiru 2021 (TATOLI) – Tribunál Distritál Dili (TDD), sábadu ne’e, aplika medida koasaun aprezentasaun periódika ba arguidu na’in-rua hosi kompañia UNITECH ho inisiál MR no AMA.

Notísia Relevante : Kazu internet ilegál, arguidu hosi UNITECH submete bá Tribunál

Komandu Polísia Nasionál Timor-Leste liuhosi Polísia Nasionál Servisu Investigasaun Kriminál (PNSIK), segunda (04/01), ezekuta mandadu detensaun Tribunál Distritál Díli (TDD) ho númeru NUC 0166/20/ PNSIK hodi halo buska no detensaun ba arguidu sira no taka obrigatóriu atividade kampaña UNITECH iha Bidau, Dili, tanba deskonfia envolve iha kazu ligasaun internet ilegál iha Timor-Leste.

Durante buska PSNIK rekolla evidénsia hanesan Power Beam ne’ebé durante ne’e kompañia UNITECH utiliza hodi kapta liña internet hosi nasaun balun hodi fornese ba instituisaun Estadu balun iha Timor-Leste.

Hafoin remata audiénsia julgamentu primeiru interrogatóriu ne’e, Advogadu Manuel Tilman ne’ebé fó asisténsia legál ba arguidu sira hateten ,tuir entendimentu parte defeza Tribunál aplika medida koasaun aprezentasaun periódika tanba laiha indísiu forte ba alegasaun MP nian hasoru arguidu sira.

“Ha’u nia kliente na’in-rua sai liberdade no juis deside desizaun ho fundamentu aplika aprezentasaun periódika,” Manuel Tilman hateten.

Arguidu sira sei aprezenta aan kada semana iha estasaun polísia ne’ebé besik no arguidu sira promete ba Tribunál atu labele halai no tenke koopera ho polísia no autoridade judisiál durante MP ninia akuzasaun sira sei iha investigasaun atu kontinua rekolla hodi aprezenta ba tribunál iha julgamentu komún iha tempu tuir mai.

Prosesu julgamentu ne’e prezide hosi juis prosesu, Afonso Carmona, Ministériu Públiku (MP) reprezenta hosi prokuradór Matias Soares, Lidia Soares, no Ambrosio Rangel.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here