Arguidu na’in-rua ho inisiál JB no NS hosi Empreza Liran TECK la'o tuituir malu iha TDD ho hatais roupa detidu. Imajen Tatoli/Nelson de Sousa

DILI, 14 janeiru 2021 (TATOLI)-Arguidu na’in-rua ho inisiál JB no NS hosi Empreza Liran TECK, ohin, submete ba iha julgamentu primeiru interrogatóriu iha Tribunál Distritál Dili (TDD).

Polísia Nasionál Timor-Leste (PNTL) liuhosi Polísia Nasionál Servisu Investigasaun Kriminál (PNSIK) iha loron 11 janeiru 2021 ezekuta mandadu detensaun hosi Tribunál Distritál Díli, ho númeru NUC 0166/20 PNSIK ba arguidu JB nu’udar jestór prinsipál Liran TECK ho nia kolega NS nu’udar sidadaun Indonézia iha area Delta, Comoro, Dili.

Notísia Relevante : Kazu internet ilegál, TDD aplika aprezentasaun periódika bá arguidu sira hosi UNITECH

PNSIK mós halo buska iha edifísiu Liran TECK hodi rekolla evidénsia hanesan ekipamentu aparellu Vsat ka Very Small Aperture Terminal, ne’ebé simu no fornese dadus ba satélite no mós Server, ne’ebé mak uza hodi halo operasaun espesiál ba rede internet hodi fornese ba instituisaun balun.

Defensór Públiku, Eustáquio Guterres, ne’ebé fó asisténsia legál ba arguidu sira, hateten, Ministériu Públiku (MP) akuza nia kliente ho krime Burla Informátika Agravadu.

Nia dehan, krime refere la relevánsia tanba internet ne’ebé fornese ba instituisaun Estadu balun liuhosi konkursu hosi Governu, no sosa tutan hosi empreza telekomunikasaun balun.

Audiénsia julgamentu ne’e hala’o iha tuku 10 ho balun hodi suspende fila-fali iha tuku 12:00 tanba arguidu na’in-rua iha konflitu de interese tribunal deside nomeia fila-fali tan defensór públiku na’in ida.
Tanba ne’e prosesu julgamentu interrogatóriu daudaun kontinua lao no taka ba públiku.

Prosesu julgamentu ne’e prezide hosi Juiza prosesu Albertina Neves no Ministériu Públiku reprezenta hosi prokuradór Ambrosio Rangel ho Lidia Soares.

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here