DILI, 05 janeiru 2021 (TATOLI)- Ministériu Públiku (MP) iha tempu badak sei hasai notifikasaun ba membru Konsellu Polítika Nasionál (CPN) partidu CNRT hodi ba presta deklarasaun kona-ba keixa balun ne’ebé hatama hosi Sekretáriu Jerál partidu FRETILIN, Marí Alkatiri, foin lalais ne’e.
Notísia Relevante : Bankada CNRT prontu hatán Alkatiri
“Iha tempu badak nia laran prokuradór sei notifika para atu rona vítima no sira seluk ne’ebé sei sai hanesan arguidu iha prosesu ida-ne’e. Provavelmente, fulan ne’e nia-klaran, ita sei rona informasaun balun,” Prokuradór Jerál Repúblika (PJR), José da Costa Ximenes, hateten hodi responde jornalista, ohin, iha Palásiu Prezidensiál Dili.
Marí Alkatiri, hato’o keixa legál ba Ministériu Públiku iha loron 06 novembru 2020, hodi kontra membru Bankada Parlamentár CNRT hamutuk na’in 21.
Iha loron 07 jullu 2020, Marí Alkatiri mós hatama ona keixa ba MP hasoru membru CPN-CNRT kona-ba akuzasaun simu subornu hosi kompañia ConocoPhillips ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Marí Alkatiri millaun $2.5.
Notísia Relevante : Marí Alkatiri Hato’o Ona Keixa Ba MP Kontra Membru CPN-CNRT
Iha loron 18 dezembru 2020, Marí Alkatiri, hato’o keixa legál Ministériu Públiku (MP) hodi kontra sidadaun na’in haat kona-ba akuzasaun operasaun skyligth.
Notísia Relevante : Operasaun Skyligth, Alkatiri hatama keixa ba MP kontra Rogério Lobato Cs
Jornalista : Nelson de Sousa
Editór : Francisco Simões
