Xefe Bankada CNRT, Duarte Nunes. Imajen/Egas Cristovão

DILI, 06 novembru 2020 (TATOLI)—Bankada Congresso Nacional da Recosntrução de Timorense (CNRT) pontu presta deklarasaun ba Ministériu Públiku (MP) kona-ba keixa Sekretáriu Jerál Frente Revolusionária Timor-Leste Independente (FRETILIN), Mari Alkatiri, maibé plenária tenke hasai imunidade.

Notisia Relevante: Alkatiri hato’o ona keixa ba MP kontra Bankada CNRT

Xefe Bankada CNRT, Deputadu Duarte Nunes, esplika bainhira ema ruma lori ema seluk ba tribubál ne’e normál bainhira sente prejudikadu ho deklarasaun ruma.

“Ami hanesan autór ba deklarasaun ne’ebé prejudika Doutór Mari Alkatiri, ami prontu ba hatán tanba tenke submete ba lei, lei mak orienta ita. Ami hein de’it bainhira pedidu ruma hosi Ministériu Públiku no tribunál. Ami hanesan deputadu iha imunidade, kualkér saida de’it tenke liuhosi prosesu, komisaun A dehan ba hatán, ami ba hatán,” Xefe Bankada CNRT, Duarte Nunes, informa ba jornalista sira, iha resintu Parlamentu Nasionál, sesta ne’e.

Nia esplika, bainhira Komisaun A informa ba bankada CNRT no lori ba plenária hodi hasai imunidade entaun bankada CNRT prontu ba hatán iha Ministériu Públiku no Tribunál.

Tuir Konstituisaun RDTL artigu 94 (imunidade), alínea 1 esplika, deputadu sira la hatán ba lia sivíl, lia kriminál eh lia dixiplinár tan sira-nia votu no sira-nia hanoin wainhira hala’o daudaun kna’ar.

Alínea 2 hosi artigu 94 ne’e hatutan, imunidade parlamentár nian bele hasai tiha tuir buat ne’ebé hakerek iha Parlamentu Nasionál nia Rejimentu.

Nune’e mós Rejimentu Parlamentu Nasionál (RPN) artigu 8 (imunidade) alínea 1 hateten, deputadu sira sei la hatán sivíl, kriminál ka disiplinarmente tanba votu no opiniaun ne’ebé sira fó kuandu hala’o sira-nia funsaun ka tanba funsaun ne’e.

Alínea 2 hosi RPN Ne’e subliña, laiha deputadu ida mak bele detein ka prende preventivamente, a não ser tanba krime dolozu ne’ebé hetan pena prizaun liu tinan lima, liuhosi Parlamentu Nasionál nia autorizasaun.

Alínea 3 fundamenta, wainhira iha prosedimentu kriminál hasoru deputadu ida no akuzasaun definitiva iha ona, Parlamentu Nasionál sei deside se Deputadu ne’e tenke suspende ka lae hodi halo tuir prosesu ne’e.

Alínea 4 hosi RPN ne’e mensiona, suspensaun ne’ebé temi iha númeru anteriór, juiz kompetente mak sei husu, liuhosi documento ne’ebé haruka ba Parlamentu Nasionál, ne’ebé sei hola desiazaun liuhosi eskrutíniu sekretu ho maioria absoluta hosi Deputadu sira-ne’ebé prezente, liutiha pareser hosi komisaun kompetente.

Alínea 5 hosi RPN argumenta, desizaun hodi la suspende deputadu, automatikamente produz efeitu atu suspende prazu ba preskrisaun ne’ebé prevee iha lei kriminál sira, kona-ba objetu akuzasaun.

Notisia Relevante: Aban, Alkatiri Keixa Membru CPN-CNRT Ba Ministeriu Públiku

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here