Sekretáriu Jerál Partidu FRETILIN, Mari Bin Amude Alkatiri. Imajen Tatoli/Egas Critovão

DILI, 18 dezembru 2020 (TATOLI)-Sekretáriu Jerál  Partidu Frente Revolusionáriu Timor-Leste Independente  (FRETILIN), Mari Bin Amude Alkatiri, ohin, ofisiálmente hatama ona  keixa  legál ba Ministériu Públiku (MP) hodi kontra Timor-oan na’in haat ne’ebé nia konsidera halo akuzasaun falsu hasoru nia kona-ba kazu operasaun Skyligth 1978.

Dokumentu ne’ebé públika kona-ba operasaun skylight. Imajen/repro Timor Archives

Eis Primeiru-Ministru Mari Alkatiri to’o iha Ministériu Públiku, Colmera, Dili, tuku 09:28 Otl, ho karreta prado númeru matrikula 03.999G.

Durante submete  keixa ba iha MP, Alkatiri akompaña hosi nia advogadu privadu José Guterres no akompaña mós hosi nia alin Ahmad Alkatiri, Nurima Alkatiri, hanesan Mari Alkatiri nia oan feto no Leandro Isaac, nu’udar apoiante ida ba partidu FRETILIN.

“Ha’u halo keixa krime kontra Timor-oan  na’in haat ne’ebé ita hotu-hotu koñese, mak hanesan Abílio Abrantes de Araújo, José Luis Guterres, Rogério Tiago Lobato ho Abílio Araújo nia kaben Guilhermina Lobo Araújo,  liga ba kazu ne’ebé ha’u konsidera sira halo denunsia kalunioza liga ba operasaun  skylight,” Mari Alkatiri  hateten ba jornalista sira hafoin rekorre keixa refera ba MP.

Nia hataten, kalúnia ne’ebé sira hala’o konsidera ne’e krime, maka sira tenke hatán no sei mós  prosesu sivíl hodi husu indemnizasaun.

Operasaun Skyligt 1978

Tuir dokumentu ne’ebé  publika hosi https://timorarchives.wordpress.com/tetun/skylight-1/  katak Operasaun Skylight iha 1978 mak hanesan parte difisil ida iha istória rezisténsia Timor-Leste nian kontra okupasaun Indonézia.

Dokumentu ne’e haktuir durante tinan 1978, Indonézia hala’o asaun militár intensivu iha Timor. Ne’e ho objetivu atu harahun Fretilin nia kontrolu iha area sidade nia li’ur sira no kontrolu ba populasaun.

Asaun militár Indonéziu sira-ne’e kauza movimentu masa hosi populasaun Timor sira no hakotu asesu ba ai-han. Operasaun ne’e rezulta hamlaha, moras no mate ne’ebé as.

Presaun militár Indonézia sira-nian ne’e mós haluan ba divizaun oi-oin iha rezisténsia organizada. La konkorda malu kona ba fiar polítika no estratéjia rezisténsia nian sai klaru bainhira Francisco Xavier do Amaral espulsa hosi Fretilin iha finál 1977.

Relatóriu iha 1977-1978 deskreve katak ‘traidór sira’ hetan espulsa ka tama komarka. Relatóriu balu mós mensiona kona-ba ezekusaun extra-judisiál ba membru rezisténsia sira.

Ida-ne’e mak kondisaun iha Timor-Leste durante tempu Operasaun Skylight iha metade segunda hosi tinan 1978.

Dokumentu ne’e mós hatudu katak operasaun skylight ne’e iha opiniaun diferente oi-oin.

Alarico Fernandes uza naran ‘Operasaun Skylight’ iha finál setembru 1978, bainhira nia manda sai mensajen radiu ho kódigu ‘Saturno’. Iha tempu ne’ebá, iha hanoin katak ‘Skylight’ ne’e mak Alarico nia naran ne’ebé uza ba planu atu oho prezidente  Nicolau Lobato.

Iha tinan sira tuir mai, hakerek na’in balu deskreve Operasaun Skylight hanesan asaun militár Indonézia no nia intelijénsia, ne’ebé lidera husi Jenerál Yusuf. Nia objetivu mak atu hamoos tiha lideransa Fretilin nian, ka obriga lider sira ne’e atu rende.

CAVR nia Relatóriu Chega! mós hanoin katak Skylight ne’e Indonézia nia planu ida. Maibé Relatoriu Chega! mós dehan katak Xanana Gusmão bolu planu ‘Movimentu Skylight’ hosi Alarico Fernandes.

Alarico Fernandes manda sai mensajen radiu ho kódigu entre finál setembru to’o finál outubru 1978. Mensajen sira-ne’e uza naran ‘Saturno’. Grupu ida kompostu hosi ema Australianu sira ne’ebé mak suporta Timor-Leste nia independénsia halo tiha gravasaun ba mensajen radiu sira ne’e. Ativista sira ne’e lokaliza iha Darwin no Sydney. (Detalla iha ami nian artigu 2016 kona ba Radio Resistensia.) Testu iha mensajen ne’e manda ba iha Fretilin nia delegasaun externa iha Maputo, Mozambique.

Iha inísiu dezembru 1978, públiku hatene ona katak Alarico Fernandes rende tiha ona ba Indonézia. Delegasaun externa Fretilin nian kondena Alarico Fernandes nia asaun sira. Maibé la fó sai testu kompletu sira hosi mensajen Saturno.

Jornál East Timor News publika rezumu ida no estratu balu hosi masajen sira-ne’e. Ativista Australianu Denis Freney hakerek artigu barak iha East Timor News. Politikamente nia besik ho membru delegasaun esternu Abílio Araujo no Rogério Lobato. Nia suporta Comite Central Fretilin (CCF) lidera hosi Nicolau Lobato, no sente triste kle’an tebes ho Nicolau Lobato nia mate.

Iha kazu “operasaun skylight” ne’ebé mak sidadaun Timor-oan na’in-haat (Abílio Abrantes de Araújo, José Luis Guterres, Rogério Tiago Lobato ho Abílio Araújo nia kaben Guilhermina Lobo Araújo) ne’ebé Mari Alkatiri, halo keixa hasoru sira tanba halo publikasaun iha mídia balun, inklui iha mídia sosiál Facebook hodi  akuza Mari Alkatiri mós deskonfia envolve hamutuk ho Alarico Fernandes iha operasaun ne’e.

Ho nune’e, Alkatiri sente ofendidu no konsidera merese atu hetan justisa ida loloos ba akuzasaun sira-ne’e liuhosi meiu legál. Tanba ne’e, Alkatiri hatama keixa kontra Timor-oan hirak ne’e iha MP.

Antes ne’e iha loron 06  novembru 2020, Mari Alkatiri, hato’o mós keixa hanesan  Ministériu Públiku (MP) hodi kontra  membru Bankada CNRT hamutuk na’in-21m, ne’ebé Alkatiri konsidera ko’alia la loos. Maski nune’e, Alkatiri la informa ba públiku tempu ne’ebá kona-ba konteúdu keixa kontra membru Bankada CNRT sira iha Parlamentu Nasionál.

Iha 07 jullu 2020, Mari Alkatiri mós hatama ona keixa ba MP hasoru Membru CPN Partidu CNRT  kona-ba  akuzasaun  simu subornu husi kompañia ConocoPhillips  ho baze dokumentu  hosi kompañia Oceanic Exploration ne’ebé akuza   katak ConocoPhillips fó subornu ba Mari Alkatiri  hamutuk millaun $2.5

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here