Arguidu ho inisiál AM hosi kompañia Globalnet submete ba julgamentu primeiru interrogatóriu iha Tribunál Distritál Dili (TDD), kinta (24/12). Imajen Tatoli/Nelson de Sousa

DILI, 24 dezembru 2020 (TATOLI)- Arguidu hosi kompañia Globalnet Unipesoal Lda, ho inisiál AM submete ona ba julgamentu primeira interrogatóriu iha Tribunál Distritál Dili (TDD).

Notísia Relevante : SIKN detein tan suspeitu ida no taka data center Globalnet

Arguidu ne’e deskonfia envolve iha kazu ligasaun internet ilegál ne’ebé durante ne’e fornese ba Globalnet nia kliente sira, inklui kliente balun hosi órgaun Estadu nian.

Arguidu AM kumpre ona detensaun durante oras 72 iha sela polísia, ohin, tuku 09:00 Otl,  akompaña  hosi Polísia Servisu Investigasaun Kriminál Nasionál (SIKN) PNTL hodi lori ba Tribunál kumpre primeira interrogatóriu.

Arguidu AM hatai roupa detidu no lima rua “futu” ho aljema (borgol) hodi tuun hosi karreta Polísia nian hodu tama ba Tribunál  Distritál Dili.

Audiénsia julgamentu primeira interrogatóriu  ne’e prezide hosi juis prosesu João Ribeiro, Ministériu Públiku nu’udar na’in ba asaun penál reprezenta hosi prokuradór Matias Soares,  no arguidu hetan asisténsia legál hosi advogadu privadu  Acaçio de Almeida   no advogadu internasionál Elsa Freitas.

Audiénsia primeira interrogatóriu ne’e taka ba públiku, inklui taka ba jornalista sira atu halo kobertura iha audiénsia laran.

Ekipa Servisu Investigasaun Kriminál Nasionál (SIKN-PNTL)  iha loron 21 dezembru 2020,  tuku 16:00  Otl, detein arguidu no iha prosesu investigasaun, parte SIKN deskonfia arguidu AM nu’udar autór importante ne’ebé hatene informasaun barak kona-ba prosesu ligasaun internet ilegál.

Notísia Relevante : SIKN buska no halo apreensaun ba dokumentu ho materiál ANC nian

Kompañia Globalnet hatama ona pedidu ba Autoridade Nasionál Komunikasaun (ANC) atu hetan lisensa sertifikadu fornese internet supply provider, maibé to’o agora ANC seidauk aprova.

Ekipa SIKN hodi IT Globalnet mós halo kedas vizita ba taka sentru dadus (data center) Kompañia Globalnet ne’ebé sentraliza iha andár tolu, Timor Plaza, Dili.

Durante halo identifikasaun ba data center  kompañia Globalnet ne’ebé durante ne’e fornese rede internet ba instituisaun Governu no halo identifikasaun ba ninia sistema kontrolu fornese rede internet uza satélite Eurostar internasionál nian ne’ebé la rejista ninia identidade iha Timor-Leste no la rejistu mós iha internasionál.

Kompañia ne’e konsidera fornese rede internet ilegál ba instituisaun Estadu no parte kompañia privadu sira ho kapasidade boot utilizasSistema kontrolu direita internet iha Singapura.

Hafoin halo tiha investigasaun hodi rekolla dadus balun iha data center, ekipa SIKN ne’ebé lidera hosi Komandante SIKN, Superintendente Xefe, José Neto Moc ho ekipa inklui traballadór Globatnet kontinua halo vizita ba haree direita ekipamentu VSAT boot rua ne’ebé monta iha área Pantai Kelapa hodi tau fita police line, no vizita mós data center inklui ekipamentu VSAT rua ne’ebé monta iha área jardín Otél Exelsior Resort nian, no área Mandarin nian.

Tuir informasaun ne’ebé Agência Tatoli asesu haktuir katak, kompañia Globatnet no R2M IT Solution, durante ne’e, halo esforsu hodi halo rejistu iha ANC, maibé parte ANC seidauk bele atribui sertifikadu rekoñesimentu ba sira-nia pretensa no atividade hodi fó de’it sertifikadu ba kompañia Timor Telecom, Telkomcel no Telemor.

Dadus  ne’ebé Agência Tatoli asesu hosi ANC hatudu katak iha kompañia ualu (8) ne’ebé halo atividade hatama pedidu lisensa koñesimentu ba Governu Timor-Leste liuhosi ANC hanesan; Kompañia Ace Consultancy, Lda, Cenime Network Satcom Timor, Lda, Gardamor ISP, Lda, Globalnet Unipesoal Lda, Metrolink Lda, Raph Vision Electronic Unipessoal Lda, Websatmedia Unipesoal Lda no W-Net Unipesoal Lda.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here