Ekipa Servisu Investigasaun Kriminál Nasionál (SIKN) PNTL halo inspesaun ba haree fasilidade no ekipamentu IT-ANC nian. Imajen Tatoli/Eugénio Pereira

DILI, 23 dezembru 2020 (TATOLI) – Ekipa Servisu Investigasaun Kriminál Nasionál (SIKN) Polísia Nasionál Timor-Leste (PNTL), ohin, purvolta  tuku 10:00 Otl, ezekuta mandadu Tribunál Distritál Dili ho númeru NUK, 0166/2020/SIKIN hodi buska no halo apreensaun ba dokumentu no materiál importante sira iha Autoridade Nasionál Komunikasaun (ANC).

Notísia Relevante : IT-ANC rekoñese operadór telekomunikasaun balun halo koneksaun internet ilegál

Ekipamentu tekníku IT-ANC nian. Imajen Tatoli/Augénio Pereira

Dokumentu no materiál importante sira ne’ebé parte SIKN rekolla no halo apreensaun maka hanesan;

  1. Mobile Sectrum Monitoring and Direction-Finding (DF) System (Sistema de monitoramento e Logalição Móvel), folhas 860.
  2. Handheld Analyzer-Spectrum Handheld Analyzer (Analisador portál-analisador espectro portal folhas 61.
  3. Broadband and Electromeganetic Field Meters (EMFS), (Medidadores de banda lagar campo electromagnético), folhas 861.
  4. Quality Monotoring System-Nemo Out-door Test Coll (Sistema de monitoramente de qualidade teste nemo ao ar livre), folhas 861.

SIKN mós koopera no reprezentante IT-ANC hodi halo mós apreensaun ba materiál seluk tan hanesan, Laptop Accer ida, telefone rua, Radio Komunikasaun (HT) rua no dokumentu sira liga ho dadus kompañia ualu (8) ne’ebé hato’o pedidu ba lisensa Internet Supply Provider (ISP).

Karreta IT-ANC nian. Imajen Tatoli/Eugénio Pereira

Hafoin rekolla materiál hirak ne’e, ekipa SIKN asegura kedas ekipamentu hirak ne’e hodi aprezenta ba Ministériu Públiku nu’udar na’in ba asaun penal nu’udar evidénsia.

SIKN foti mós dokumentu kompañia ualu hanesan, Ace Consultancy, Lda, Cenime Network Satcom Timor, Lda, Gardamor ISP, Lda, Globalnet Unipesoal Lda, Metrolink Lda, Raph Vision Electronic Unipessoal Lda, Websatmedia Unipesoal Lda no W-Net Unipespal Lda ne’ebé antes ne’e hato’o pedidu ba ANC.

Hosi kompañia hirak ne’e, SIKN halo ona buska no apreensaun ba kompañia sira hanesan, Elite Computer, Globalnet Unipesoal Lda, ho R2M IT Solution ne’ebé halo koneksaun rede satélite ilegál hosi Singapura hodi fornese mai Timor-Leste.

Kompañia hirak ne’e mós identifika balun foin hatama sira nia pedidu ba ANC no parte ANC mezmu ba halo ona identifikasaun ba kompañia sira-nia lokalizasaun, maibé seidauk hetan sertifikadu Internet Supply Provider (ISP).

SIKN sei kontinua halo nafatin operasaun buska no apreensaun ba suspeitu hosi kompañia ilegál seluk  ne’ebé eziste iha Timor-Leste.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here