Ekipa Servisu Investigasaun Kriminál Nasionál (SIKN) PNTL ezekuta mandadu Buska no Apreensaun ba IT-ANC hodi asegura mós dokumentu importante balun hanesan evidénsia Imajen Tatoli/Eugénio Pereira

DILI, 23 dezembru 2020 (TATOLI)- Tékniku sira Autoridade Nasionál Komunikasaun (ANC) rekoñese durante ne’e sira identifika duni operadór telekomunikasaun boot balun ne’ebé eziste iha Timor-Leste halo koneksaun rede internet ilegál hosi rai-li’ur liga mai Timor-Leste.

Notísia Relevante : R2M husu ANC klarifika razaun la atribui lisensa Internet Service Provider

Evidensia ne’ebé SIKN asegura hosi IT-ANC. Imajen Tatoli/Eugénio Pereira

Tékniku IT (Information Technology) ANC nian ne’e rekoñese perante Servisu Investigasaun Kriminál Nasionál (SIKN) hosi Polísia Nasionál Timor-Leste (PNTL) halo mandadu Buska no Apreensaun hosi Tribunál Distritál Dili ho NUK 0126/20/SIKN iha edifísiu ANC, Ministériu Transporte Telekomunikasaun, Caicoli Dili.

IT ANC sira rekoñese, informasaun kona-ba dadus ho relatóriu ne’ebé tékniku sira aprezenta ba lideransa másimu sira hosi ANC, maibé parte autoridade hirak ne’e haree tiha relatóriu, maibé la foti asaun hasoru kompañia hirak ne’ebé identifikadu halo ligasaun internet ilegál hahú hosi tinan 2015 to’o agora.

Hahalok lideransa ANC sira ne’ebé hatene informasaun koneksaun internet ilegál ne’e hodi halo finje la liga relatóriu ne’e fó prejuizu ba Estadu Timor-Leste lakon osan tokon.

Durante ne’e Estadu Timor-Leste prevee ona Orsamentu Jerál Estadu boot hodi investe ba iha ekipamentu ne’ebé ANC hetan maka hanesan;

  1. Mobile Sectrum Monitoring and Direction-Finding (DF) System (Sistema de monitoramento e Logalição Móvel), folhas 860.
  2. Handheld Analyzer-Spectrum Handheld Analyzer (Analisador portál-analisador espectro portal folhas 61.
  3. Broadband and Electromeganetic Field Meters (EMFS), (Medidadores de banda lagar campo electromagnético), folhas 861.
  4. Quality Monotoring System-Nemo Outodoor Test Coll (Sistema de monitoramente de qualidade teste nemo ao ar livre), folhas 861.
Ekipamentu IT-ANC nian ne’ebé SIKN asegura nu’udar eivensia. Imajen Tatoli/Eugénio Pereira

Ekipamentu hirak ne’e, Estadu Timor-Leste sosa tiha, no parte tékniku IT hosi ANC rasik Estadu Timor-Leste kapasita ona sira-nia rekursu hodi utiliza kontrolu ba Sistema ligasaun internet ilegál, maibé depois ekipa tékniku sira identifika liña distribuisaun internet ilegál, maibé autoridade komponente hanesan Diretór Tékniku ANC no Prezidente ANC rasik la hatudu vontade hodi halo asaun prevensaun ba atividade koneksaun internet ilegál hirak ne’e.

Notísia Relevante : Kazu prezidente ANC, TR seidauk simu rekursu MP kontra TDD

Iha prosesu ezekuta mandadu Tribunál nian ne’e, ekipa investigadór SIKN konsege identifika omisaun (pembiaraan) ne’ebé komete hosi Diretór Tékniku Anteriór ho inisiál JOF, ne’ebé agora daudaun mós kualifikadu hanesan arguidu ho númeru NUK NUK 0166/20/SIKN.

Relasiona ho kazu ne’e, Ministériu Públiku rasik bolu ona lideransa másimu balun hosi ANC hodi ba presta deklarasaun iha Ministériu Públiku, hafoin SIKN halo buska hasoru Prezidente ANC, João Olivio Freitas, foin lalais ne’e.

Iha loron 23 novembru liubá, SIKN ezekuta mandadu buska no detensaun no apreensaun jestór prinsipál kompañia Telekomunikasaun Telemor ho inisiál TVB no jestór prinsipál kompañia Eleite Computer ho inisiál DP ne’ebé deskonfia envolve iha kazu ligasaun internet ilegál.

Suspeitu na’in-rua SIKN detein tuir despaxu Tribunál Distritál Dili (TDD) ho NUK 0166/20/PSIC hodi halo mós primeiru julgamentu iha Tribunál Dili no daudaun ne’e kumpre ona prizaun preventiva iha prizaun Becora.

SIKN deskobre kompañia rua ne’e halo korrelasaun utiliza internet ilegál ne’ebé uza hosi Indonézia nian ho kapasidade 600MBS ne’ebé fasilita ba liña ministériu sira inklui no instituisaun autónoma no privadu sira.

Suspeitu rua ne’e Ministériu Públiku akuza komete kazu burla informátika no kazu fraude fiskál.

Notísia Relevante : SIC detein jestór prinsipál Telemor ho Elite Computer

Iha loron 26 Novembru, SIKN mós ezekuta mandadu buska, detensaun no apreensaun no arguidu Prezidente ANC, João Olivio Freitas, ne’ebé ninia kazu aprezenta ona primeiru interrogatóriu iha Tribunál hodi hetan Termu Identidade Rezidénsia (TIR) hodi hein prosesu investigasaun.

Maski durante ne’e ekipa investigadór SIKN sira la iha rekursu sufisiente no ekipamentu sofistikadu atu utiliza hodi deskobre autór sira ne’ebé envolve iha kazu koneksaun rede internet ilegál ne’ebé fó prejuizu Estadu, maibé sira nia parte iha nafatin vontade no espíritu nasionalizmu atu salva Estadu Timor-Leste hosi kuakér ameasa no manipulasaun ho krime modernu ne’ebé liga ho teknolojia.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here