DILI, 22 dezembru 2020 (TATOLI)-Komisaun Anti-Korrupsaun (CAC) kontinua analiza informasaun ne’ebé antes ne’e rekolla kona-ba sasán ‘fuhuk’’ iha programa Cesta Bázika.
Notísia Relevante : Sasán Cesta Bázika “fuhuk”, CAC bolu obrigatóriu diretora aprovizionamentu MTCI
“Ekipa investigadór sira sei halo hela analiza informasaun sira ne’ebé rekolla tanba ne’e ha’u labele pronunsia uluk tanba lei bandu katak investigasaun la’o labele fó sai uluk,” Adjuntu Komisáriu ba Asuntu Prevensaun no Sensibilizasaun CAC, Luis Oliveira Sampaio, haktuir ba Tatoli, ohin, iha nia edifísiu CAC.
Nia hatutan, prosesu ida ne’e iha servisu investigasaun iha ámbitu investigasaun ne’ebé ekipa investigadór sira halo ona identifikasaun tuir artigu 53 kódigu prosesu penál atuasaun polisiál ne’ebé haree ba investigadór sira hanesan mós natureza polisiál tanba CAC iha nia natureza hanesan mós polísia espesializada ba krime korrupsaun.
Luis Oliveira, esplika, kuandu iha servisu sira ne’ebé diresaun prevensaun halo inspesaun tuir kna’ar ne’ebé iha indísiu irregularidade ruma sai risku ba korrupsaun atu halo atuasaun nesesária tuir lei haruka.
Notísia Relevante : Ministru Joaquim: ”loja fornesedór Cesta Bazika komete irregularidade, prosesa legál”
Antes ne’e, CAC halo ona identifikasaun ba jestór loza Dili Mart na’in-rua (2) no kargu xefia na’in-rua hosi Ministériu Turizmu Komérsiu no Indústria (MTCI) hodi presta deklarasaun relasiona ho distribuisaun sasán ‘’fuhuk’’ iha programa Cesta Bázika iha Raikotu, Suku Comoro, Dili, 09 dezembru 2020.
Iha loron tuir mai, ekipa CAC tun direita ba ramu loza Dili Mart nian ida iha Raikotu, Comoro, Dili, hodi bolu obrigatóriu jerente kompañia Dili Mart ho inisiál EMM nune’e mós iha tuku 11:00 ekipa CAC kontinua tun ba iha loza Dili Mart nian iha Akadiruhun, Dili, hodi bolu mós jestór prinsipál ho inisiál DSL.
Iha tempu hanesan iha tuku 14:00 Otl, CAC mós tun ba edifísiu Ministériu Turizmu Komérsiu Indústria (MTCI) iha Mandarin, Dili, hodi bolu obrigatóriu atuál Diretora Aprovizionamentu MTCI, Maria dos Martires.
Notísia Relevante : Sasán Cesta Bázika “fuhuk”, CAC bolu obrigatóriu jestór Dili Mart ho ofisiál MTCI
Iha fali loron 11 dezembru, tuku 9:00 dadeer, ekipa CAC liuhosi espesialista anti-korrupsaun kontinua tun ba iha edifísiu MTCI bolu Adjuntu Koordenadór Cesta Bázika hosi MTCI, Rozito Monteiro hodi halo identifikasaun.
Jornalista : Nelson de Sousa
Editór : Francisco Simões
