Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

BAUCAU, 20 dezembru 2020 (TATOLI)—Ministru Koordenadór Asuntu Ekonómiku, Joaquim Amaral, hateten loja sira ne’ebé sai hanesan fornesidór iha Cesta Bázika bainhira komete infrasaun tenke prosesa tuir dalan legál.

“Bainhira komete infrasaun tenke prosesu tuir dalan legál no ita labele trava atu ita hotu bele aprende,” Ministru afirma iha seremónia distribuisaun Cesta Bázika iha suku Vemasse Tasi, postu administrativu Vemasse, munisípiu Baucau.

Nia dehan, Governu komunika ona autoridade kompetente sira atu hamutuk tau matan ba implementasaun programa Governu ne’e, tanba konfiansa ne’ebé Governu atribui ba empreza sira presiza hatudu ho di’ak no asegura.

“Sira tenke investe ba sira-nia prestíjiu kompañia iha kualker servisu no loja, ita hatene katak sasán a’at ne’e sempre iha maibé labele tau modo futun a’at ida atu taka tomak loja ne’e ninia atividade, ne’e mós la justu. Karik modo futun ida a’at, tenke hasai tanba iha produtu lubuk boot ida ne’ebé maka povu bele hili,” nia akresenta.

Notísia Relevante: Sasán Cesta Bázika “fuhuk”, CAC bolu obrigatóriu jestór Dili Mart ho ofisiál MTCI

Governante ne’e iha esperansa, loja sira ne’ebé antes ne’e hetan xamada tanba tau produtu a’at iha loja bainhira komunidade troka voucher presiza hadi’a no aprende atu kontinua serví di’ak liután.

Maski nune’e, tuir Ministru, Govenu sei hadi’a mekanizmu distribuisaun Cesta Bázika iha loja sira.

“Hadi’a hanesan kualidade no kuantidade, imi bele haree  melloramentu desde iha fulan-novembru mai klaran to’o agora komesa mudansa oituan, buat barak ita komesa muda no distribuisaun mós komesa la’o ho númeru,” nia karesenta.

Biban ne’e, nia husu ba orgaun fiskalizadór sira Autoridade Inspesaun no Fiskalizasaun Atividade Ekonómika no Sanitária (AIFAESA), Provedoria Direitu Umanu no Justisa (PDHJ, sigla portugés), Komisaun Antí-Korrupsaun (CAK, sigla portugés) hodi hamutuk atu asegura programa rekperasaun ekonómika ne’e bele susesu no povu bele hetan nia direitu.

Antes ne’e, CAC bolu obrigatóriu jestór kompañia Dili Mart hamutuk ho ofisiál  Ministériu Turizmu, Komérsiu no Indústria  (MTKI) atu presta deklarasaun kona-ba   rezultadu inspesaun ne’ebé    ekipa Espesialista Anti-Korrupsaun halo iha Supermerkadu Dili Mart, identifika produtu Cesta Bázika balun “fuhuk”.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here