Batar "fuhuk", koto "fuhuk" no modo dodok ne'ebé CAC foti bainhira halo monitorizasaun iha prosesu distribuisaun sasán Cesta Bázika iha Super Merkadu Dili Mart, Raikotu, Comoro, Dili, kuarta (09/12). Imajen/CAC

DILI, 09 dezembru 2020 (TATOLI)–Komisaun Anti-Korrupsaun (CAC) bolu obrigatóriu jestór kompañia Dili Mart ho ofisiál  Ministériu Turizmu, Komérsiu no Indústria  (MTCI) atu kinta (10/12), tuku 09:00 Otl,  marka prezensa iha edifísiu CAC iha Faról, Dili, hodi halo identifikasaun no investigasaun.

Notísia Relevante : CAC deskonfia sasán Cesta Bázika la balansu ho valor osan

Adjuntu Komisáriu CAC, Luis de Oliveira Sampaio, lidera ekipa Espesialista Anti-Korrupsaun (EAK) hala’o intervensaun imediatu hodi prende batar “fuhuk”, koto “fuhuk”, modo dodok no hapara obrigatóriamente fahe ai-han iha programa Cesta Bázika iha Super Merkadu Dili Mart, Raikotu, Comoro, Dili, kuarta (09/12). Imajen/CAC

CAC hasai ona karta notifikasaun tuir kódigu prosesu penál 53 pontu 1. Tanba ne’e, CAC alerta tan katak, se parte sira notifikadu mak la marka prezensa maka CAC sei uza forsa atua.

Adjuntu Komisáriu CAC ba asuntu Prevensaun no Sensibilizasaun, Luis Oliveira Sampaio, konfirma ba Agência Tatoli, ohin, katak notifikasaun ba parte-sira ne’e atu bele presta deklarasaun kona-ba   rezultadu inspesaun ne’ebé    ekipa Espesialista Anti-Korrupsaun (EAK) halo iha Super Merkadu Dili Mart ne’ebé distribui sasán “fuhuk” iha programa Cesta Bázika.

Adjuntu Komisáriu CAC, Luis de Oliveira Sampaio, lidera ekipa Espesialista Anti-Korrupsaun (EAK) hala’o intervensaun imediatu hodi prende batar “fuhuk”, koto “fuhuk”, modo dodok no hapara obrigatóriamente fahe ai-han iha programa Cesta Bázika iha Super Merkadu Dili Mart, Raikotu, Comoro, Dili.

Asaun ne’e CAC foti hafoin hala’o hela kna’ar iha terrenu hodi monitoriza prosesu fahe ai-han Césta Bázika no deteta batar “fuhuk”, koto “fuhuk” no modo tahan dodok sira ne’e la merese ona atu fahe hodi populasaun konsumu.

CAC la’ós hapara de’it prosesu fahe ai-han bázika obrigatóriamente ba povu iha Suku Comoro, maibé prende mós ai-han-sira ne’ebé “fuhuk” ona hanesan batar, koto no modo tahan dodok sira.

Adjuntu Komisáriu CAC, Luis de Oliveira Sampaio, hateten EAK no komisaun “la soi” atu kompañia Dili Mart kontinua fahe ai-han bázika sira tanba ai-han bázika “fuhuk” ne’e merese atu fó han fahi no la’ós povu kbiit laek-sira.

“Ami ko’alia tiha ona ho manager kompañia atu hapara distribuisaun ai-han bázika hanesan batar “fuhuk”, koto “fuhuk” no modo tahan dodok ba populasaun. Ai-han “fuhuk” sira-ne’e merese fó han ba animal ka fahi no la’ós ba ita ninia povu,” Luis Sampaio afirma.

Liuhosi pájina ofisial Facebook CAC nian haktuir mós katak ekipa EAK mós prende kafé falun balun tanba la tuir lista grama no folin ne’ebé Ministériu Turizmu,  Komérsiu no Indústria (MTCI) determina. Maibé, iha terrenu kompañia Dili Mart fahe la tuir ninian kilograma determinadu.

“Batar ne’ebé “fuhuk” ho modo ne’ebé dodok ami prende no sei halo prosesu depois ami sei notifika na’in ba Super Merkadu Dili Mart no autoridade kompetente iha MTCI ne’ebé mak durante ne’e akompaña no  sira ninia responsabilidade atu halo supervizaun. Sira mai  sira haree hela mais husik hela de’it la halo intervensaun,” Luis Sampaio haktuir.

Nia hatutan, sasán sira-ne’e la refleta kualidade ne’ebé mak  povu merese hetan no valor $25,00 ne’ebé mak iha.

Hosi sorin seluk, antes ne’e, CAC mós deskobre sirkunstánsia hanesan iha fatin seluk Hera, Metinaro no Liquiça, maibé kompañia no autoridade kompetente la hadi’a.

“Ohin, ami halo intervensaun hodi hapara distribuisaun Cesta Bázika ne’e. Ami aviza tiha ona mais sira lakohi hadi’a. Entaun ami hapara  no lori sasán “fuhuk” no dodok sira-ne’e ba no halo prosesu investigasaun tuir mai,” Adjuntu Komisáriu CAC, Luis Sampaio afirma tan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here