DILI, 10 dezembru 2020 (TATOLI)-Komisaun Anti-Korrupsaun (CAC), ohin, tuku 14:00 Otl, tun ba iha edifísiu Ministériu Turizmu, Komérsiu no Indústria (MTCI) iha Mandarin, Dili, hodi bolu obrigatóriu Diretora Aprovizionamentu MTCI, Maria dos Martires, hodi bele halo identifikasaun relasiona ho fornesimentu sasán Cesta Báziku “fuhuk” iha ramu loza Dili Mart nian iha Raikotu,Comoro, Dili.
Notísia Relevante : Sasán Cesta Bázika “fuhuk”, CAC kontinua investiga jerente Dili Mart
Hafoin ekipa espesialista anti-korrupsaun hosi CAC bolu diretora aprovizionamentu MTCI ne’e kontinua lori ba iha edifísiu CAC iha Faról, Dili, hodi halo identifikasaun no presta deklarasaun.
Iha prosesu investigasaun CAC nian ba diretora aprovizionamentu MTCI ne’e remata iha tuku 15:30 Otl. Tuir informasaun ne’ebé Agência Tatoli asesu hosi CAC katak, iha sesta (11/12), sei kontinua bolu kargu xefia balun iha MTCI no posibilidade bolu mós membru governu balun hodi fó deklarasaun.
Notísia Relevante : Sasán Cesta Bázika “fuhuk”, CAC bolu obrigatóriu jestór Dili Mart ho ofisiál MTCI
Jornalista : Nelson de Sousa
Editór : Francisco Simões
