Prezidente Autoridade Nasionál Komunikasaun (ANC), João Oliveira Freitas, partisipa iha julgamentu primeiru interrogatóriu iha Tribunál Distritál Dili, domingu (29/11/2020). Imajen TATOLI/Nelson de Sousa.

DILI, 09 dezembru 2020 (TATOLI)-Ministru Transporte no Komunikasaun, José Agostinho da Silva, to’o oras ne’e, seidauk autoriza prezidente ANC (Autoridade Nacional de Comunicacões), João Olivio Freitas, tama servisu hala’o nia knar hodi hein desizaun finál hosi Tribunál

Notísia Relevante : MP akuza Prezidente ANC ho krime lima

Ministru Transporte Komunikasaun, José Agostinho da Silva. Imajen TATOLI/Egas Cristovão

Liuhosi audiénsia julgamentu primeira interrogatóriu, foin lalais ne’e, iha Tribunal Distritál Dili (TDD), juiz titulár hatún desizaun hodi aplika Termu Identidade Rezidénsia (TIR) ba João Olivio Freitas, ne’ebé sai arguidu tanba deskonfia envolve iha fornesimentu liña internet ilegál hosi kompaña Elite Computer no operadór Telekomunikasaun  Telemor.

“Ha’u labele komenta ida ne’e, maibé nia (João Olivio Freitas, red) la tama servisu tanba ita haree hela prosesu judisiáriu ne’ebé agora daudaun la’o hela,” Ministru José Agostinho, hateten, ohin, bainhira akompaña debate OJE 2021 iha faze espesialidade iha Parlamentu Nasionál.

Governante ne’e hatutan, daudaun hein no akompaña ba prosesu investigasaun ne’ebé la’o hela, iha desizaun mak foin bele foti desizaun ruma, maski Tribunál Distritál Dili fó ona TIR.

Notísia Relevante : Tribunál aplika TIR ba Prezidente ANC

Polísia Nasionál Timor-Leste (PNTL) liuhosi Servisu Investigasaun Kriminál (SIC), kinta (26/11), purvolta tuku 11:00 Otl, halo detensaun ba Prezidente ANC, João Olivio Freitas, tanba deskonfia iha relasaun ho ligasaun internet ilegál ne’ebé durante ne’e komete hosi arguidu TVB nu’udar jestór prinsipál hosi operadór Telekomunikasaun Telemor no arguidu DP nu’udar jestór prinsipál kompañia Elite Computer.

Autoridade Polísia Timor-Leste hamutuk ho ekipa konjunta diretamente tama ba edifísiu ANC nian iha Ministériu Transporte no Komunikasaun (MTK) iha Caicoli, Dili, hodi halo buska no detensaun ba prezidente ANC hodi kumpre mandadu buska, detensaun no apreensaun hosi Tribunál Distritál Dili (TDD) ho NUK 0166/20/PNSIK, nune’e bele submete ba investigasaun no aprezenta ba primeiru julgamentu iha TDD.

Notísia Relevante : Deskonfia, prezidente ANC iha relasaun ho ligasaun internet ilegál

Dokumentu ne’ebé sai baze ba SIC hodi halo detensaun ba Prezidente ANC ne’e tanba deskonfia halo koordenasaun servisu ho arguidu jestór prinsipál Elite Computer ho inisiál DP no arguidu jestór prinsipál Telemor ho inisiál TVB, hodi halo fornesimentu internet ilegál foti hosi satélite Indonézia ba instituisaun Governu Timor-Leste inklui Komandu Jerál PNTL

Mezmu Tribunál aplika ona TIR, maibé hosi parte Ministériu Públiku nu’udar na’in ba asaun penál kontinua rekolla prova nune’e bele aprezenta ba Tribunál iha julgamentu normal iha tempu tuir mai.

Notísia Relevante : SIC detein jestór prinsipál Telemor ho Elite Computer

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here