Polísia Nasionál Timor-Leste lori Prezidente ANC, João Oliveira Freitas, ba julgamentu iha Tribunál Distritál Dili, Segunda (29/11/2020). Imajen TATOLI/Antonio Goncalves

DILI, 30  novembru 2020 (TATOLI)-Tribunál Distritál Dili   (TDD), ohin, liuhosi desizaun julgamentu primeiru interrogatóriu aplika Termu Identidade Rezidénsia (TIR) ba  Prezidente Autoridade Nasionál Komunikasaun (ANC), arguidu João Olivio Freitas.

Notísia Relevante : MP akuza Prezidente ANC ho krime lima

Polísia Nasionál Timor-Leste (PNTL) liuhosi Servisu Investigasaun Kriminál (SIC), kinta (26/11) purvolta  tuku 11:00 Otl, halo detensaun ba Prezidente ANC, João Olivio  Freitas, tanba deskonfia iha relasaun ho ligasaun internet ilegál ne’ebé durante ne’e komete arguidu TVB nu’udar jestór prinsipál  hosi operadór Telekomunikasaun Telemor no arguidu DP nu’udar jestór prinsipál   kompañia  Elite Computer.

Autoridade  Polísia  Timor-Leste hamutuk ho ekipa konjunta diretamente tama ba edifísiu ANC nian iha Ministériu Transporte no Komunikasaun (MTK)  iha Caicoli, Dili hodi halo buska no detensaun ba prezidente ANC hodi  kumpre mandadu  buska, detensaun no apreensaun hosi Tribunál Distritál Dili (TDD) ho NUK 0166/20/PNSIK, nune’e bele submete  ba investigasaun no aprezenta ba primeiru  julgamentu iha TDD.

Tuir dokumentu ne’ebé sai baze ba SIC hodi halo detensaun  ba Prezidente ANC ne’e tanba deskonfia halo koordenasaun servisu ho arguidu jestór prinsipál Elite Computer  ho inisiál DP no arguidu jestór prinsipál Telemor ho inisiál TVB, hodi halo fornesimentu internet ilegál foti hosi satélite  Indonézia  ba instituisaun Governu Timor-Leste, inklui Komandu Jerál PNTL.

Arguidu, João Olivio  Freitas, Ministériu Públiku akuza ho krime  administrasaun danosa previstu iha artigu 274, korrupsaun pasiva iha artigu 292, burla informátika agravadu  ne’ebé previstu no punidu iha artigu 296 no krime fraude fiskál iha artigu 314, hotu-hotu hosi  kódigu penál Timor-Leste no krime seluk MP sei  iha hela investigasaun.

Hafoin remata audiénsia  primeiru interrogatóriu ba jornalista, Advogadu privadu Manuel Tilman ne’ebé fó asisténsia ba prezidente ANC, arguidu João Olivio Freitas, hateten, razaun Tribunál aplika TIR ba nia kliente tanba  laiha prova ne’ebé aprezenta hosi Ministériu Públiku (MP).

“Desizaun Tribunál nian ohin liberta  hodi  aplika TIR ba ha’u nia kliente  ne’e parte defeza sente justu,” advogadu Manuel Tilman hateten.

Ho desizaun TIR ba oin arguidu kuandu iha Dili sai ba fatin seluk hanesan munisípiu tenke relata ba parte autoridade polísia hafoin hala’o viajen no atividade servisu normal hanesan baibain.

Mezmu Tribunál aplika ona TIR, maibé hosi parte Ministériu Públiku nu’udar na’in ba asaun penál kontinua rekolla prova nune’e bele aprezenta ba Tribunál iha  julgamentu normal iha tempu tuir mai.

Prosesu audiénsia julgamentu primeiru interrogatóriu ne’e prezide hosi Juiza Ercilia da Silva, Ministériu Públiku reprezenta hosi  Prokuradora Lidia Soares.

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here